Oʻzbekiston Respublikasi Prezidenti
Shavkat Mirziyoyev Janobi Oliylariga
Janobi Oliylari!
2020 yil sentyabr oyida Birlashgan Millatlar Tashkiloti Bosh Assambleyasining 75-sessiyasida ilgari surilgan Pandemiyalar davrida davlatlarning ixtiyoriy majburiyatlari toʻgʻrisidagi xalqaro kodeks loyihasini Jahon sogʻliqni saqlash tashkilotiga (JSST) taqdim etganingiz uchun Sizga minnatdorchilik bildirish sharafiga muyassarman.
COVID-19 pandemiyasi butun dunyo boʻylab hamjamiyatlar va mamlakatlarga talafot yetkazishda davom etmoqda. Oʻtkir xalqaro inqirozga duch kelib, men favqulodda global yetakchilik va birdamlikka, imkon qadar keng doiradagi sheriklarni birlashtirishga, koʻp tomonlama saʼy-harakatlarni ishga solish va hech kimning orqada qolib kelmasligini taʼminlashga chaqirdim. Salkam bir yilda biz ilm-fan, vaksinalarni ishlab chiqish, sogʻliqni saqlash amaliyotidagi misli koʻrilmagan yutuqlar, jamoatchilikni safarbar qilish va siyosiy sobitqadamlik tufayli kuchli yetakchilikka erishishning imkoni borligini koʻrdik.
Pandemiya sogʻliqni saqlash tizimlarimiz zaif ekanini koʻrsatdi, tibbiy va ijtimoiy tengsizlikni kuchaytirdi hamda sogʻliqni saqlash iqtisodiy taraqqiyot va xavfsizlikda markaziy oʻrin egallashini namoyish etdi. Pandemiyani nazoratga olib, tiklanishga investitsiya yoʻnaltirayotgan ekanmiz, kelajakka ham tayyorgarlik koʻrishimiz lozim. Bunday vaziyat yana takrorlanishiga yoʻl qoʻyolmaymiz.
Janobi Oliylari, Xalqaro kodeks loyihasini ishlab chiqish masalasida uzoqni koʻzlaganingiz va bu jarayonda yetakchilik qilganingiz uchun Sizdan minnatdorman. Biz hujjatni diqqat bilan oʻrganib chiqdik. Unda qoʻyilgan vazifalarning koʻlami va taklif etilgan amaliy yechimlar menda katta taassurot qoldirdi. Kodeks loyihasi taqdim etilgani oʻz vaqtida qabul qilingan qaror boʻldi.
Oʻtgan yili biz pandemiyadan koʻp saboq chiqardik va endilikda kelajakka nazar tashlashimiz kerak. Jahon sogʻliqni saqlash assambleyasining COVID-19ga qarshi choralar boʻyicha WHA73.1 rezolyusiyasiga muvofiq men 2020 yil sentyabr oyida ish boshlagan Xalqaro tibbiy-sanitariya qoidalarining (2005 yil) amal qilishini oʻrganish Qoʻmitasini chaqirdim hamda Pandemiyaga shaylikni taʼminlash va javob choralari boʻyicha Mustaqil guruhni taʼsis etdim.
Bundan tashqari, aʼzo davlatlar tomonidan amalga oshirilayotgan jarayon doirasida Xalqaro tibbiy-sanitariya qoidalariga qoʻshimchalar kiritish maqsadida pandemiyaga shaylik va javob choralari toʻgʻrisida global hadli konvensiyani ishlab chiqish imkoniyati yuzasidan munozaralar davom etmoqda. Mazkur masala 2021 yil 18 mart kuni oʻtgan JSSTning tashkilotga aʼzo davlatlar uchun moʻljallangan axborot sessiyasida muhokama qilindi, bu koʻplab mamlakatlarda qiziqish uygʻotdi va keyingi muhokamalar uchun qadam boʻlib xizmat qildi.
Barchaning xavfsiz kelajagiga sarmoya kiritish, barqaror va ishonchli sogʻliqni saqlash tizimlarini barpo etish hamda sogʻliqni saqlash sohasida yuzaga kelishi mumkin boʻlgan har qanday inqirozlarga shay turishga tayyorgarlik koʻrish vaqti keldi. Janobi Oliylari, siyosiy yetakchiligingiz tufayli Sizning bu boradagi ishtirokingiz hal qiluvchi ahamiyatga ega. Siz taqdim etgan Xalqaro kodeks loyihasi pandemiyani oʻrganish boʻyicha amaldagi jarayonlarga va pandemiyaga qarshi kurashish boʻyicha har qanday boʻlajak xalqaro hujjatni rejalashtirishga bevosita bogʻliq. Siz ushbu saʼy-harakatlarda shaxsan ishtirok etishda davom etishingizga umid qilaman.
Janobi Oliylari, COVID-19 pandemiyasini oldini olish va barchaning sogʻlom va xavfsiz kelajagini taʼminlash ishiga sodiqligingiz uchun Sizga yana bir bor tashakkur bildiraman. Jahon sogʻliqni saqlash tashkiloti jamoat salomatligi sohasidagi ushbu global favqulodda vaziyatda Siz bilan hamjihatdir.
Janobi Oliylari, Sizga boʻlgan yuksak hurmat-ehtiromimni qabul qilgaysiz.
Eng ezgu tilaklar va minnatdorlik bilan
Doktor Tedros Adanom Gebreyesus,
Jahon sogʻliqni saqlash tashkiloti bosh direktori
