Maʼlumki, oʻtgan yilning dekabr oyida Fransiya kasalxonalariga 35 nafar Lactalis quruq sutidan zaharlangan emizikli goʻdaklar yotqizilib, ularning 18 nafariga oʻtkir ichak kasalligi infeksiyasi diagnozi qoʻyilgandi, deya xabar beradi Euronews axborot xizmati.
Aniqlanishicha, mazkur quruq sutlar tarkibiga tayyorlanish jarayonida gigiyenaga amal qilinmaganligi natijasida salmonella infeksiyasi tushgan. Shunga qaramay, Fransiyada yirik tijoriy oziq-ovqat kompaniyalar Lactalis quruq sutlarini sotishni davom ettirganlar. Kuni kecha mazkur yirik tijoriy oziq-ovqat kompaniyalari keng jamoatchilikdan rasmiy ravishda uzr soʻradilar.
Fransiyadagi Jabrlangan bolalar Assotsiatsiyasi prezidenti Kventin Giyeman aytishicha, Lactalis quruq sut mahsulotlarini ishlab chiqaruvchi kompaniyasining Picot va Milumel nomli sutlari jahonnning 65 ta davlatiga eksport qilinib, jahon jamoatchiligini ana shu sutlarni sotib olmaslikka chaqirdi. “Gap millionlab sut qutilari haqida boryapti ular millionlab emizikli bolalarni kasal qilishi mumkin” deydi Kventin Giyeman.
Salmonella infeksiyasi qishloq xoʻjaligi hayvonlaridan yuquvchi ichak bakteriyasi boʻlib, bu bilan zaharlangan kishilarda diariya, oshqozon ogʻrigʻi, qusish va organizm suvsizlanishi kabi simptomlar kuzatilib, bu ayniqsa yosh bolalar uchun katta xavf tugʻdiradi.
Bugun Fransiyada mazkur sutdan kasallangan 35 nafar bolalar tuzalib, uyga qaytganlar.
Oydin Saʼdullayeva tayyorladi.
