Shoirlik degan kasb yoʻqdir dunyoda,
Hech kimga “Shoir” deb berilmas diplom.
Yuraging yorishib ketar ziyodan,
Tuyqus sheʼr yozilsa –
Yoʻqlasa ilhom.
Va lekin tiriklik urhosi aro
Sen ham el qatori koyitgaysan jon.
Ne baxtki, joningga kirgaydir oro –
Gazeta, radio, oynai jahon…
Soʻz va tasvir izlab,
Yorugʻ niyatda
Mavzular izmida chopgaysan zir-zir:
Ishlaysan ter toʻkib tahririyatda,
Kasbing aniq – muxbir va yo muharrir.
Nafis tashbehlardan avval qalaming
Oʻjar jumlalarga tegib, charxlanar.
Goh olmos misoli tansiq – kaloming,
Goho mis singari arzon narxlanar.
Rozisan,
Sheʼringni ovutib tunlar,
Kunduz quloq tutib davring sasiga.
Koʻksingdan yechilgay chigal tugunlar –
Toʻy qilsang gonorar jamlanmasiga…
Ulkan Tahririyat asli bu – VATAN,
Olamga yoʻllagan har soʻzi ezgu.
Balki shoir deya olmas meni tan,
Muxbirim, desa, bas – saodatim shu!
Axir, shoirlik bu – kasb emas, illo,
Hech kimga “Shoir” deb berilmas hujjat.
Hilol yoʻngan oydin qalamim ila
Elga xizmat qilsam, men uchun shu – baxt.
Oʻkinmang, doʻstlarim,
Yozmasangiz ham,
Safda turganlarning sobit birisiz.
Yurt yukin yelkaga olganingiz dam,
Shubhasiz, shu elning muharririsiz.
Neki xato boʻlsa – qilgaysiz tahrir,
Tuzatgaysiz – neki boʻlsa gar gʻaliz.
Davr kitobini yozyapmiz, axir,
Shu xalqning ishongan muharriri – biz!
Qogʻozga tusharkan koʻngil uchquni,
Ekranlar yorishib, ziyoga toʻlgay.
Demak, har kunimiz – Matbuot kuni,
Demak, har kunimiz muborak boʻlgay!
26.06.2019
Goʻzal sheʼriyatda ifodalangan dil soʻzlari orqali — Gazeta, radio, oynai jahon… vebsayt, nashriyot va matbaa, axborot xizmatlarida ishlayotgan barcha kasbdoshlarimizni Matbuot va ommaviy axborot vositalari xodimlari kuni bilan samimiy qutlaymiz!
