Mamlakatimizda amalga oshirilayotgan keng koʻlamli yangilanishlar “Inson, jamiyat, davlat» tamoyiliga yaʼni inson manfaatlari hamma narsadan ustun” degan ezgu amallarga asoslanadi. Bu xayrli yumushga yurtimizdagi fuqarolik jamiyati institutlari, nodavlat tashkilotlar ham faol hissa qoʻshib kelmoqda.
Oʻzbekiston Qizil Yarim Oy Jamiyati Toshkent shahar tashkiloti va Halq deputatlari Toshkent shahar Kengashi huzuridagi Jamoat fondi hamkorligida 2022 yil 16 mart kuni “Kommunikatsiya” dasturi boʻyicha yaʼni nodavlat notijorat tashkilotlari oʻrtasida axborot almashish maqsadida seminar tashkil etildi.
Tadbirda Oʻzbekiston Qizil Yarim Oy Jamiyati Toshkent shahar tashkiloti, Xalq deputatlari Toshkent shahar Kengashi huzuridagi jamoat fondi, Toshkent shahar adliya boshqarmasi vakillari, Ijtimoiy sheriklik boʻyicha jamoat komissiyasi aʼzolari, NNT va fuqarolik jamiyatining boshqa institutlari xamda OAV vakillari ishtirok etdilar.
Seminarda Qizil Xoch va Qizil Yarim Oy Xalqaro harakatining tarixi, tarkibiy qismlari, vazifalari, asosiy tamoyillari hamda Qizil Xoch va Qizil Yarim Oy Xalqaro harakatining nishonlari ularning paydo boʻlish sabablari, hozirgi kundagi faoliyati va erishilayotgan yutuqlari bilan tanishtirildi.
Tadbirda soʻzga chiqqanlar Qizil Xoch va Qizil Yarim Oy Xalqaro harakatining asoschisi, tarkibiy qismlari, maqsad — vazifalari, Oʻzbekiston Qizil Yarim Oy Jamiyatining tamoyillar asosidagi faoliyati toʻgʻrisida batafsil maʼlumotlar berib oʻtdilar.
Shu bilan birga nodavlat notijorat tashkilotlari va fuqarolik jamiyatining boshqa institutlarini qoʻllab-quvvatlash, yanada rivojlantirish va ularning mamlakatda demokratik oʻzgarishlarni amalga oshirishda, jamiyatni erkinlashtirishda faol ishtirok etishiga koʻmaklashish maqsadida Xalq deputatlari Toshkent shahar Kengashi huzuridagi Jamoat fondi tomonidan 2022 yil uchun ”Hech kim mehr va eʼtibordan chetda qolmaydi” mavzusidagi Davlat grantining 1-tanlovi eʼlon qilindi.
Yigʻilishda Jamoat fondi rahbari, Xalq deputatlari Toshkent shahar Kengashi deputati H.Qoʻchqarova qatnashib, jamoat fondining faoliyati, amalga oshirilgan ishlar, ijtimoiy sheriklik darajasi, ajratilgan grantlar yuzasidan batafsil gapirdi.
Tadbir davomida Toshkent shahrida faoliyat yuritayotgan nodavlat notijorat tashkilotlari va fuqarolik jamiyatining boshqa institutlari vakillari tomonidan oʻzlari qiziqtirgan savollarga javoblar olindi.
Seminar soʻngida ishtirokchilar bilan Xalq deputatlari Toshkent shahar Kengashi huzuridagi jamoat fondi tomonidan eʼlon qilingan Davlat grantining 1-tanlovi yuzasidan loyihalarni yozish boʻyicha malakali mutaxassilar ishtirokida oʻquv seminar oʻtkazilishiga kelishib olindi.
Mavluda TOJIYEVA, Xalq deputatlari Toshkent shahar Kengashi huzuridagi Jamoat fondi bosh mutaxassisi
