Poytaxtning Yakkasaroy tumanidagi Yu.Rajabiy nomidagi mahallada mahalla raisi Ulugʻbek Hakimov tashabbusi hamda «Sogʻlom ona va bola» ayollar va yoshlar markazi hamkorligida oʻzbek tiliga davlat tili maqomi berilganligining oʻttiz yilligi munosabati bilan tadbir uyushtirildi.
Ushbu mahallada fan taraqqiyotiga, jumladan, oʻzbek tili, adabiyoti va sanʼatining yuksalishiga munosib hissa qoʻshgan koʻplab allomalar yashab ijod qilishgan. Mazkur dargohda Oʻzbekiston xalq yozuvchisi Abdulla Qahhor uy-muzeyi, maqomlarni kitoblarda muhrlagan Oʻzbekiston xalq artisti, taniqli hofiz, bastakor Yunus Rajabiy uy-muzeyi joylashgan. Shuningdek, matematika maydonining buyuklari – Oʻzbekiston Fanlar akademiyasi akademiklari, Oʻzbekistonda xizmat koʻrsatgan fan arboblari – Saʼdi Sirojiddinov va Maxmud Salohiddinovlarning nurga intilgan ijodlariga, tinimsiz izlanishlariga guvoh boʻlgan qadrdon dargoh bu…
Bu mahalla oʻz anʼanalari va qadriyatlariga ega ulugʻ dargohlardan biri ekanligini bugungi yoshlarning saʼy-harakatlari, intilishlari ham tasdiqlaydi. Mahalladagi maktablarda iqtidorli bolalar ham ayni kunda koʻplab yetishib chiqmoqda. Ikki nafar Zulfiya nomidagi Davlat mukofoti sovrindori, koʻplab fan olimpiadasi va sport yoʻnalishi gʻoliblari taʼlim olmoqda. Ularning ham Oʻzbekistonni, oʻzbek xalqini, oʻzbek tilini jahonga tanitishda munosib hissalari bor.
Oʻzbek xalqining iqtidorli shoirasi va tadbirkor Farida Afroʻz oʻz soʻzida ona tilimiz – milliy gʻururimiz, oʻzligimiz ekanligi haqida gapirdi. Tashbehlarga va ruhiy kechinmalarga boy sheʼrlaridan yod oldi. Farida Afroʻzning oʻzbek tili goʻzalligini oʻzida ifoda qilgan “Qirq kokilligim”, “Iztirob koʻylagi”, “Tunlar isyoni”, “Koʻzim manim…” “Qurbonjon dodxoh” (tarixiy drama,), “Oʻzimdan oʻzimgacha”, “Poka yest na zemle razluka”, “Ot Faridiʼ Afruz” (Moskva, 2004), “Gun aydin” (Istambul, 2004), “Ushshoq, “Tasbih”, “Oʻsha kun – bugundir” nomli sheʼriy toʻplamlari chop etilgan boʻlib, ulardan toʻrttasini mahalla kutubxonasiga armugʻon qildi.
Kamina mahalla kutubxonasiga avval oʻz ijodimdan “Harorat”, “Yurt qoʻshiqlari”, “Onaginam” “Qisasi Rabgʻoʻziy” kabi asarlarimni sovgʻa qilgan edim. Bu safar mumtoz adabiyotning goʻzal namunasi Saʼdiyning “Guliston” asarini armugʻon qildim.
Mahalla ahli bilan uchrashuv hamishagidek qiziqarli va sheʼriy ohanglar ila dilxush oʻtdi.
Raʼno Zaripova,
“Sogʻlom ona va bola” markazi rahbari,
Oʻzbekiston Respublikasida xizmat koʻrsatgan jurnalist
