Raqamli texnologiyalar vazirligida ayollarning axborot texnologiyalari sohasidagi yutuqlariga bagʻishlangan “Yulduz Tech Awards” taqdirlash marosimi boʻlib oʻtdi.
Tadbirdan maqsad xotin-qizlarning IT rivojiga qoʻshgan hissasini eʼtirof etish, qoʻllab-quvvatlash va professional aloqalarni mustahkamlashdan iborat.
Taqdirlash marosimida 25 nafar xotin-qizga IT sohasida erishgan yuksak yutuqlari uchun esdalik statuetkalari topshirildi. Bu mukofotlar ularning mehnati eʼtirofi, kasbiy mahorati va kelajak avlodlar uchun ilhom timsoliga aylandi.
Tadbir doirasida intellektual viktorina ham boʻlib oʻtdi. Unda ishtirokchilar texnologiya va uni rivojlantirishda ayollarning oʻrni haqidagi bilimlarini namoyish etdi. Viktorina gʻoliblari esdalik sovgʻalari bilan taqdirlandi.
Tadbir tajriba almashish, aloqalarni yoʻlga qoʻyish, murabbiylik va taʼlim tashabbuslarining ahamiyatini muhokama qilish uchun maydonga aylandi.
Tashkilotchilar IT sohasida ayollar salohiyatini qoʻllab-quvvatlashni davom ettirish maqsadida “Yulduz Tech Awards” mukofotini yillik tadbirga aylantirishni rejalashtirmoqda.
N.Rahmonova, OʻzA
