Mazkur markaz qadimiy va koʻp asrlik tarixga ega, yetti iqlimga mashhur meʼmoriy obidalarni oʻz ichiga olgan.
Mehmonlar koʻhna Ark qalʼasi, Poyi Kalon majmuasi tarkibiga kiruvchi Minorai Kalon, Masjidi Kalon va Mir Arab madrasasi hamda shaharning boshqa diqqatga sazovor joylari bilan tanishdi. 10 ming kishiga moʻljallangan Masjidi Kalon tarixi, binoning meʼmoriy ulugʻvorligi, ibodatchilar uchun yaratilgan qulayliklar mehmonlarda katta taassurot qoldirdi.
Afgʻoniston delegatsiyasi aʼzolari Kogon tumani hududida joylashgan buyuk ajdodimiz Bahouddin Naqshband yodgorlik majmuasida boʻlib, Naqshbandiya tariqatining yirik namoyandasi qabrini ziyorat qildi. Qurʼon tilovat qilindi.
Shuning bilan Afgʻoniston Islom Respublikasi Prezidenti Muhammad Ashraf Gʻanining mamlakatimizga tashrifi nihoyasiga yetdi.
