Oʻzbekiston Yozuvchilar uyushmasi aʼzosi, shoira Farida Afroʻz uyushma raisining oʻrinbosari etib tayinlandi.
Shu munosabat bilan Yozuvchilar uyushmasida Prezident Administratsiyasi va Vazirlar Mahkamasi masʼul xodimlari hamda uyushma jamoasi ishtirokida yigʻilish boʻlib oʻtdi. Yigʻinni uyushma raisi, xalq shoiri Sirojiddin Sayyid olib bordi. Soʻzga chiqqanlar Farida Afroʻzga ushbu masʼuliyatli vazifani vijdonan va halol bajarishida muvaffaqiyatlar tilashdi.
Farida Afroʻz (Boʻtayeva Farida) – 1956 yil 5 martda Qoʻqon shahrida tugʻilgan. 1994 yildan buyon Oʻzbekiston Yozuvchilar uyushmasi aʼzosi. Uning «Qirqkokilligim», «Iztirob koʻylagi», «Tunlar isyoni», «Koʻzim manim…», «Qurbonjon dodxoh» tarixiy dramasi, «Oʻzimdan oʻzimgacha», «Poka yest na zemle razluka…», «Ot Faridiʼ Afruz» (Moskva), «Gun aydin» (Istambul), «Ushshoq», “Tasbih”, “Oʻsha kun – bugundir” singari sheʼriy toʻplamlari chop etilgan. Sheʼrlari rus, turk, ingliz, nemis, fransuz, fors, uygʻur, ozor, gagouz, xitoy, koreys tillariga tarjima qilingan.
Oʻz navbatida shoira jahon adabiyotidan yapon haykularini, turk sheʼriyatidan Mustafo Otaturk, Ziyo Koʻkalp, Husayn Otsiz, Dogʻlarja, Ismat Oʻzal sheʼrlarini, fors sheʼriyatidan Mehri Hirotiy hamda zamonaviy fors sheʼriyatidan Zahro Abul Husayniy, Sudoba, Soya Kabiriy gʻazallarini, zamonaviy qozoq va qoraqalpoq sheʼriyatidan va amerikalik ruhshunos Deyl Karnegi asarlarini oʻzbek tiliga tarjima qilgan.
Farida Afroʻz “Janob” nomli erkaklar uchun va “Sabo” nomli ayollar jurnallari hamda “Art Rekords” bosmaxonasining taʼsischisidir.
1999 yili Oʻzbekiston Prezidenti farmoni bilan “Shuhrat” medali, 2001 yili “Oʻzbekiston Mustaqilligining 10 yilligi” koʻkrak nishoni, 2017 yilda “Doʻstlik” ordeni bilan taqdirlangan. Oʻtgan chaqiriqda Oliy Majlis Qonunchilik Palatasining deputati sifatida faoliyat yuritgan.
Toshkent shahar “Sogʻlom ona va bola” ayollarni va yoshlarni qoʻllab quvvatlash nodavlat va notijorat tashkiloti va GUJUM.UZ sayti jamoasi Farida Afroʻzni yangi lavozimga tayinlangani bilan muborakbod etadi. Masʼuliyatli ishida omadlar tilaydi.
