“Koʻksaroy” qarorgohida oʻtgan oliy darajadagi Oʻzbekiston-Turkmaniston muzokaralari yakunida hujjatlarni imzolash marosimi boʻldi, deya xabar beriladi prezident. uz rasmiy veb- saytida.
Shavkat Mirziyoyev va Serdar Berdimuhamedov Qoʻshma bayonot imzoladilar. Unda erishilgan asosiy kelishuvlar mustahkamlab qoʻyilgan hamda ikki mamlakat oʻrtasidagi koʻp qirrali oʻzaro manfaatli hamkorlik va strategik sheriklikni yanada kengaytirish va mustahkamlash boʻyicha uzoq muddatli vazifalar belgilangan.
Davlat rahbarlari huzurida ikki mamlakat vazirlik va idoralari rahbarlari tomonidan bitimlar imzolandi. Jami 19 ta hujjatga imzo chekildi, shular jumlasidan:
— Transport-tranzit sohasidagi hamkorlikni rivojlantirish toʻgʻrisida bitim;
— Turizm sohasidagi hamkorlik toʻgʻrisida bitim;
— Amudaryo suv resurslarini boshqarish, muhofaza qilish va ulardan oqilona foydalanish toʻgʻrisida bitim;
— Tashabbusli ilmiy-tadqiqot loyihalarining qoʻshma tanlovini oʻtkazish toʻgʻrisida bitim;
— 2022-2025 yillarga moʻljallangan savdo-iqtisodiy hamkorlik va sanoat kooperatsiyasini rivojlantirish dasturi;
— 2022-2024 yillarga moʻljallangan ilmiy-texnik hamkorlik toʻgʻrisida dastur;
— 2023-2024 yillarga moʻljallangan tashqi ishlar vazirliklari oʻrtasidagi hamkorlik dasturi;
— Oʻzbekiston-Turkmaniston chegaraoldi savdo zonasi – Savdo markazini tashkil etish va faoliyatini tartibga solish toʻgʻrisidagi Hukumatlararo bitim qoidalarining amaliy ijrosini taʼminlash boʻyicha chora-tadbirlar rejasi.
Shuningdek, kimyo tarmogʻi, bojxona, temir yoʻllar, muzeylar, adliya, yoshlarga doir siyosat, teleradioeshittirish va boshqa sohalardagi hamkorlik yuzasidan qator hujjatlar imzolandi.
