Prezident Shavkat Mirziyoyev 2 sentyabr kuni Islom Karimov nomidagi ilmiy-maʼrifiy yodgorlik majmuasiga tashrif buyurib, Oʻzbekistonning Birinchi Prezidenti haykali poyiga gulchambar qoʻydi, uning yorqin xotirasiga hurmat bajo keltirdi.
Islom Karimov 2016 yil 2 sentyabr kuni vafot etgan edi. Davlatimiz rahbari Shavkat Mirziyoyevning qaroriga koʻra har yili bu sana Xotira kuni sifatida yod etilmoqda.
Birinchi Prezidentning qatʼiyati va jasorati bilan yurtimiz mustaqillikka erishgan, taraqqiyot yoʻlida ulkan muvaffaqiyatlarni qoʻlga kiritgan. Islom Karimovni qancha eʼzozlasak, xalqimizga, yoshlarimizga maʼnaviyat yetkazgan boʻlamiz, deya taʼkilagandi Shavkat Mirziyoyev.
Ushbu marosim ham davlat va jamoatchiligimizning Islom Karimovga hurmati ifodasi boʻldi.
Qurʼon tilovat qilindi. Birinchi Prezidentimizning hayoti va faoliyati, orzu-istaklari, mamlakatimizda tinchlik-osoyishtalikni taʼminlashdagi xizmatlari yodga olindi.
Gul qoʻyish marosimida parlament va hukumat aʼzolari, fan va madaniyat namoyandalari, ziyolilar, yoshlar ishtirok etdi.
Islom Karimovning Samarqand va Qarshi shaharlaridagi haykallari poyiga ham gullar qoʻyildi.
