Oʻzbekiston davlat jahon tillari universiteti Kengashining navbatdagi 3-son yigʻilishi boʻlib oʻtdi.
Yigʻilishni OʻzDJTU Kengashi raisi, rektor Ilxomjon Tuxtasinov ochib berdi. Yigʻilishda universitet faoliyatiga oid turli masalalar yuzasidan oʻquv maskani rahbariyati vakillarining axboroti tinglandi, muhokama etildi.
Yigʻilishning ikkinchi qismida ilmiy daraja olgan hamda samarali mehnati eʼtirof etilgan ustoz-muallimlarni tabriklash marosimi boʻlib oʻtdi. Xalqaro jurnalistika fakulteti Axborot xizmati va jamoatchilik bilan aloqalar kafedrasi oʻqituvchilari Raʼnojon Zaripova va Maftuna Maxmudovaning filologiya fanlari boʻyicha falsafa doktori (PhD) ilmiy darajasini beruvchi diplomni olganligi bilan qutlab, noutbuk bilan taqdirlashdi.
Shuningdek, Rus filologiyasi fakulteti Rus tili va oʻqitish metodikasi kafedrasi professori vazifasini bajaruvchisi Dusmamat Kulmamatovga professorlik ilmiy unvonining diplomi tantanali ravishda topshirildi.
«Yaponiya-Oʻzbekiston Ipak yoʻli» jamgʻarmasi Xalqaro almashinuv uchun maʼsul, inson resurslarini rivojlantirish loyihasida «Yapon tilidagi xalqaro talabalarni qoʻllab-quvvatlash xizmatlari»ni targʻib qilishga katta hissa qoʻshgani uchun Oʻzbekiston davlat jahon tillari universiteti rektori, professor Ilhomjon Tuxtasinov, Yaponiya Bosh vaziri rafiqasi Yuko Kishida Yaponiya va Oʻzbekiston oʻrtasidagi doʻstlik va madaniy almashinuv hamda tarixiy aloqalarni oʻrnatishdagi hissasi uchun Oʻzbekiston davlat Jahon tillari universiteti Yapon kafedrasi mudiri Nargiza Hamidova hamda xorijiy tillar (ingliz, nemis, fransuz, italyan, ispan, koreys, xitoy, yapon, arab) fan olimpiadasining Respublika bosqichini oʻtkazishda tashkiliy va maʼnaviy vazifalarni yuqori darajada bajarishga munosib hissa qoʻshgan universitetning ilmiy ishlari va innovatsiyalar boʻyicha prorektori Otabek Yusupov, ingliz tili 1-fakulteti dekani Akmal Yuldoshev tashakkurnoma bilan taqdirlanishdi.
Davlat buyurtmasi asosida buyuk sarkardalar “Amir Temur va Jaloliddin Manguberdi” nomli asarni tayyorlash hamda harbiy soha va harbiy taʼlim tizimi xodimlarining ilmiy salohiyatini oshirishda koʻrsatgan xizmatlari uchun universitet rektori, professor Ilhomjon Tuxtasinov, ilmiy ishlar va innovatsiyalar boʻyicha prorektor Otabek Yusupov, ilmiy va innovatsion ishlanmalarni tijoratlashtirish boʻlimi boshligʻi Feruza Abdullayeva, Rus filologiyasi fakulteti dekani Azizxon Raxmonov, Tarjimonlik fakulteti dekani Ulugʻbek Yuldoshev va ushbu fakultetning ingliz tili tarjima nazariyasi kafedrasi oʻqituvchisi Alisher Hamidov Oʻzbekiston Respublikasi Mudofaa vazirligining koʻkrak nishoni va tashakkurnomasi bilan taqdirlanishdi.
Iqbol PARDAYEVA, OʻzDJTU Axborot xizmati boʻlimi yetakchi mutaxassisi
