Oʻzbekiston Respublikasi Prezidenti Shavkat Mirziyoyev 20 dekabr kuni Tokio shahrida Yaponiya Imperatori Naruxito bilan uchrashdi, deya xabar beriladi prezident. uz rasmiy veb- saytida.
Imperator oliy martabali mehmonni samimiy qutlar ekan, ushbu tashrif Oʻzbekiston-Yaponiya doʻstlik va strategik sheriklik munosabatlarini mustahkamlashda muhim voqea boʻlgani, ikki tomonlama munosabatlarni sifat jihatidan yangi darajaga olib chiqqanini qayd etdi.
Davlatimiz rahbari Imperator Naruxitoga chuqur hurmat-ehtiromini bildirib, «Reyva» deb nomlangan yangi davrda Yaponiya uygʻun rivojlanishda davom etishi, mamlakat nufuzi va aholi farovonligi yanada oshishini taʼkidladi.
Prezident Shavkat Mirziyoyev va uning rafiqasi Ziroat Mirziyoyeva tashrifi sharafiga Yaponiya Imperatori Naruxito va uning rafiqasi Masako xonim tomonidan qabul marosimi oʻtkazildi. Shuningdek, ular birgalikda suratga tushdilar.
