Oʻzbekiston Respublikasi Prezidenti Shavkat Mirziyoyev Yevropa tiklanish va taraqqiyot banki Boshqaruvchilar kengashining 32-yillik yigʻilishida ishtirok etish uchun Samarqand shahriga keldi, deya xabar beriladi prezident. uz rasmiy veb- saytida.
Davlatimiz rahbari yigʻilish yalpi sessiyasida nutq soʻzlaydi.
Sammit ishida Yevropa tiklanish va taraqqiyot banki prezidenti Odil Reno-Basso, Yevropa Komissiyasi vitse-prezidenti Valdis Dombrovskis, YeTTB Boshqaruvchilar kengashi raisi Magnus Brunner, xorijiy hukumatlar, yetakchi transmilliy korporatsiyalar va sanoat xoldinglari, xalqaro moliya institutlari va banklarning rahbarlari va vakillari, shuningdek, dunyoning 70 ta mamlakatidan iqtisodiyot, investitsiyalar, moliya va innovatsiyalar sohasi ekspertlari va tahlilchilari, fuqarolik jamiyati faollari va jurnalistlar – jami 2,5 mingdan ziyod ishtirokchi qatnashmoqda.
Tadbir global iqtisodiyot istiqbollarini keng muhokama va chuqur tahlil qilish, uning barqaror taraqqiyotini taʼminlash yuzasidan tavsiyalar ishlab chiqish uchun muhim platformadir.
Iqtisodiyot barqarorligiga sarmoya kiritish, xalqaro savdoni ragʻbatlantirish, energetik xavfsizlikni taʼminlash va qayta tiklanuvchi energiya manbalarini joriy etish, raqamlashtirishni jadallashtirish, moliyaviy infratuzilmani modernizatsiya qilish, kichik va oʻrta biznesni qoʻllab-quvvatlash, “yashil” iqtisodiyot dasturini ilgari surish masalalari forumning markaziy mavzulari boʻladi.
Tadbir doirasida davlatimiz rahbari xorijiy delegatsiyalar rahbarlari bilan qator uchrashuvlar oʻtkazishi rejalashtirilmoqda.
Taʼkidlash joizki, YeTTB mamlakatimizdagi ijtimoiy-iqtisodiy islohotlar dasturini ilgari surishda faol ishtirok etmoqda.
Mana uch yildirki, Oʻzbekiston ushbu yetakchi moliyaviy institutdan jalb qilingan investitsiyalar hajmi boʻyicha mintaqada yetakchilik qilmoqda. Bugungi kunda Bank loyihalarining portfeli 3 milliard yevrodan oshdi, unda xususiy sektorga investitsiyalar ulushi 55 foizdan ziyodni tashkil qilmoqda.
