Mamlakatimiz qishloq xoʻjaligi sohasi ogʻir judolikka uchradi. Butun hayoti va mehnat faoliyatini qishloq xoʻjaligi rivojiga bagʻishlagan taniqli fermer, Oʻzbekiston Qahramoni Ahmad Narzullayev shu yil 1 noyabr kuni 68 yoshida vafot etdi, deya xabar beriladi prezident. uz rasmiy veb- saytida.
A.Narzullayev 1956 yili Denov tumanida tugʻildi. Mehnat faoliyatini tumandagi “Surxonoziqovqatsanoati” aksiyadorlik jamiyatida boshladi. Keyinchalik Toshkent politexnika institutini tamomlab, “Shargʻun” gʻisht zavodida, Denov tumanidagi 37-mexanizatsiyalashgan koʻchma kolonna va eksperimental ishlab chiqarish birlashmasida turli vazifalarda ishladi. 1991 yildan “Lochin” fermer xoʻjaligi rahbari sifatida fidokorona mehnat qildi.
A.Narzullayev 50 yildan ziyod davom etgan ish faoliyati mobaynida boy bilim va hayotiy tajribasini, kuch-gʻayratini el-yurt ishiga bagʻishladi. Oʻzini yer ilmining haqiqiy bilimdoni, zamonaviy agrotexnologiyalar va xoʻjalik yuritish usullarini puxta egallagan tashkilotchi rahbar, mehnatsevar, kamtarin va vatanparvar inson sifatida namoyon etib, respublikamizda qishloq xoʻjaligi sohasidagi keng koʻlamli islohotlarni amalga oshirish, fermerlik harakatini rivojlantirishga munosib hissa qoʻshdi.
U koʻp yillar Surxondaryo viloyati va Denov tumani xalq deputatlari kengashlarining aʼzosi sifatida ushbu hududlarni ijtimoiy-iqtisodiy rivojlantirish va yuksaltirish, aholining turmush sharoitini yaxshilash, taʼlim, tibbiyot, madaniyat maskanlari qurish va obod qilish, yangi bogʻ va xiyobonlar barpo etish, yoshlarni ona yurtga muhabbat va sadoqat ruhida tarbiyalashda jonbozlik koʻrsatdi.
Tajribali fermer oʻnlab iqtidorli shogirdlar tayyorlab, qishloq xoʻjaligi sohasini malakali kadrlar bilan taʼminlash borasida ham ibrat namunasini koʻrsatdi.
Ahmad Narzullayevning koʻp yillik samarali mehnati davlatimiz tomonidan munosib taqdirlandi. U “Oʻzbekiston Qahramoni” unvoni va “Mehnat shuhrati” ordeni bilan mukofotlangan edi.
Mamlakatimiz qishloq xoʻjaligi sohasining yetuk namoyandasi, mehribon ustoz, samimiy va kamtarin inson Ahmad Narzullayevning yorqin xotirasi qalbimizda hamisha saqlanib qoladi.
Sh.Mirziyoyev, T.Norboyeva, N.Ismoilov,
A.Aripov, S.Turdiyev, U.Qosimov
