Oʻzbekiston Respublikasi Prezidenti Shavkat Mirziyoyev 9 mart kuni Eron Islom Respublikasi Milliy xavfsizlik oliy kengashi kotibi Ali Shamxoniy boshchiligidagi delegatsiyani qabul qildi, deya xabar beriladi prezident. uz rasmiy veb- saytida.
Oʻzbekiston-Eron munosabatlarini yanada kengaytirish masalalari va mintaqaviy hamkorlikning muhim jihatlari koʻrib chiqildi.
Uchrashuv avvalida Ali Shamxoniy davlatimiz rahbariga Eron Prezidenti Ibrohim Raisiyning salomi va eng ezgu tilaklarini yetkazdi.
Oʻzbekiston yetakchisi oliy darajada erishilgan kelishuvlarga muvofiq ikki tomonlama hamkorlik jadal rivojlanib borayotganini mamnuniyat bilan qayd etdi. Oʻzaro savdo hajmi ortmoqda, ikki mamlakat yetakchi korxonalari va kompaniyalarining sanoat kooperatsiyasi kengaymoqda. Oʻtgan oyda Tehron shahrida Hukumatlararo komissiyaning navbatdagi yigʻilishi va biznes forum muvaffaqiyatli oʻtkazildi. Yana bir qator muhim tadbirlar rejalashtirilgan.
Bugun Toshkent shahrida oʻtgan Xavfsizlik boʻyicha qoʻshma komissiya birinchi yigʻilishining amaliy natijalari ijobiy baholandi.
Suhbat chogʻida savdo-iqtisodiy va transport-kommunikatsiya sohalarida sheriklik loyihalari va dasturlarini ilgari surish, mintaqaviy xavfsizlikni taʼminlash, shu jumladan xavfi ortib borayotgan terrorizm, ekstremizm, transmilliy jinoyatchilik va narkotiklarning noqonuniy aylanmasi tahdidlariga qarshi kurashish masalalarida samarali hamkorlikni davom ettirishga alohida eʼtibor qaratildi.
Afgʻonistonda yuzaga kelayotgan vaziyat hamda ushbu mamlakatdagi gumanitar inqirozni yengib oʻtishga zarur koʻmak koʻrsatish choralari yuzasidan fikr almashildi.
