Oʻzbekiston Respublikasi Prezidenti Shavkat Mirziyoyev 26 dekabr kuni Sankt-Peterburg shahrida Rossiya Federatsiyasi Prezidenti Vladimir Putin tashabbusi bilan oʻtkazilgan MDH davlatlari rahbarlarining norasmiy uchrashuvida ishtirok etdi, deya xabar beriladi prezident. uz rasmiy veb- saytida.
Sammitda Ozarbayjon Respublikasi Prezidenti Ilhom Aliyev, Belarus Respublikasi Prezidenti Aleksandr Lukashenko, Qozogʻiston Respublikasi Prezidenti Qasim-Jomart Toqayev, Qirgʻiz Respublikasi Prezidenti Sadir Japarov, Tojikiston Respublikasi Prezidenti Emomali Rahmon, Turkmaniston Prezidenti Serdar Berdimuhamedov va Armaniston Respublikasi Bosh vaziri Nikol Pashinyan ham qatnashdi.
Joriy yildagi hamkorlik yakunlari sarhisob qilinib, boʻlajak 2023 yil uchun ustuvor vazifalar muhokama qilindi. Mintaqaviy va xalqaro ahamiyatga molik dolzarb masalalar yuzasidan ham fikr almashildi.
Bugungi kunda Oʻzbekiston MDH doirasidagi hamkorlikni uch yoʻnalishda: siyosat va xavfsizlik borasida, iqtisodiy va gumanitar sohalarda rivojlantirmoqda.
MDH makonida toʻlaqonli erkin savdo hududini shakllantirish va transport jihatidan oʻzaro bogʻliqlikni mustahkamlash ustuvor vazifalardir.
Sanoat kooperatsiyasini chuqurlashtirish, oziq-ovqat, energetik va ekologik xavfsizlikni taʼminlashga qaratilgan milliy dastur va strategiyalarni amalga oshirish boʻyicha saʼy-harakatlarni birlashtirishga alohida eʼtibor qaratilmoqda.
Keyingi yillarda Oʻzbekiston Hamdoʻstlik faoliyatidagi ishtirokini faollashtirdi, 40 dan ortiq koʻp tomonlama bitimlarni imzoladi hamda MDHning 23 ta tarmoq organlariga qoʻshildi.
2022 yilda Oʻzbekistonning Hamdoʻstlik mamlakatlari bilan tovar ayirboshlashi uchdan bir hissaga ortdi, 1 mingdan ziyod qoʻshma korxonalar tashkil etildi.
Bugun, 27 dekabr kuni Prezidentimiz MDH davlatlari rahbarlari bilan birgalikda Sankt-Peterburgdagi Davlat rus muzeyiga tashrif buyurdi. Bu yerda mehmonlar muzey toʻplamidagi eksponatlar va sanʼat asarlari bilan tanishdi hamda norasmiy uchrashuv oʻtkazdi.
Shu bilan davlatimiz rahbarining amaliy tashrifi yakunlandi, u “Pulkovo” xalqaro aeroportidan Toshkentga joʻnab ketdi.
