Oʻzbekiston Respublikasi Prezidenti Shavkat Mirziyoyev va Fransiya Respublikasi Prezidenti Emmanuel Makron Fransuz alyansining Samarqand shahridagi filialiga tashrif buyurdilar, deya xabar beriladi prezident. uz rasmiy veb- saytida.
Fransuz tili va madaniyatini targʻib qilishga koʻmaklashuvchi ushbu nohukumat notijorat tashkilot 1883 yilda Parij shahrida Jyul Vern va Lui Paster kabi oʻz davrining atoqli shaxslari tashabbusi bilan tuzilgan. Bugungi kunda Fransuz alyansining 800 dan ziyod filiali dunyoning 137 ta mamlakatida faoliyat yuritmoqda.
Alyansning mamlakatimizdagi birinchi filiali 2015 yilda Toshkentda ochilgan edi. Madaniyat va til sohasidagi ikki tomonlama almashinuvlarni yanada kengaytirish maqsadida yaqinda Samarqand shahrida yana bir filial tashkil etildi.
Tashrif chogʻida davlat rahbarlari tasmani tantanali ravishda kesdilar va markazni ochib berdilar.
Prezidentlar zamonaviy jihozlangan markazning imkoniyatlari bilan tanishdilar. Bu yerda fransuz tili va adabiyoti boʻyicha oʻquv kurslari tashkil etiladi. Markaz 200 nafargacha fransuz madaniyatiga qiziquvchilarni qabul qila oladi.
Alyansning Samarqanddagi faoliyati xalqlarimizni yanada yaqinlashtirish, oʻzaro doʻstlikni mustahkamlashga xizmat qilishiga ishonch bildirildi.
