Ommaviy axborot vositalari vakillari bilan uchrashuvda Oʻzbekiston Respublikasi Prezidenti Shavkat Mirziyoyev va Turkmaniston Prezidenti Serdar Berdimuhamedov boʻlib oʻtgan muzokaralar toʻgʻrisidagi fikrlari bilan boʻlishdilar, deya xabar beriladi prezident. uz rasmiy veb- saytida.
Oʻzbekiston yetakchisi Turkmaniston Prezidentining tashrifi xalqlarimiz oʻrtasidagi koʻp asrlik doʻstlik, yaxshi qoʻshnichilik, ishonch va oʻzaro qoʻllab-quvvatlashga asoslangan birodarlik rishtalari tarixida yangi sahifa ochishga qaratilganini taʼkidladi.
– Bugun biz Serdar Gurbanguliyevich bilan mazmunli, ochiq va batafsil muzokaralar oʻtkazdik, ular, shubhasiz, hamkorligimizni yangi, yanada yuqori darajaga olib chiqadi, — dedi Prezidentimiz. – Biz ikki tomonlama kun tartibidagi barcha dolzarb masalalarni har tomonlama muhokama qildik. Hamkorlikning bugungi holati yuzasidan fikr almashdik, bu borada katta yutuqqa erishilganini qayd etdik. Siyosiy, savdo-iqtisodiy, transport, suv-energetika va gumanitar yoʻnalishlarda birgalikdagi ishimizning ustuvor jihatlarini belgilab oldik.
Davlatimiz rahbari Turkmaniston bilan har tomonlama hamkorlikni yanada mustahkamlash Oʻzbekiston tashqi siyosatining oʻzgarmas ustuvor yoʻnalishi ekanini qayd etdi.
Koʻp qirrali Oʻzbekiston-Turkmaniston munosabatlarining mustahkamlanishiga Turkmaniston Milliy Kengashi Xalq Maslahati Raisi Gurbanguli Berdimuhamedovning hissasi beqiyos ekani alohida taʼkidlandi.
– Bugun Turkmaniston Prezidenti Serdar Berdimuhamedov ushbu chuqur oʻylangan siyosatni davom ettirayotganidan biz, Oʻzbekiston chin dildan xursandmiz, — dedi mamlakatimiz yetakchisi.
Shavkat Mirziyoyev muzokaralarda ikki mamlakat oʻrtasidagi hamkorlikning muhim sohalaridagi barcha masalalar batafsil koʻrib chiqilganini qayd etdi.
Qator istiqbolli yoʻnalishlar boʻyicha, sanoat kooperatsiyasi loyihalarini amalga oshirish, tovar ayirboshlashni koʻpaytirish, chegaraoldi savdo zonasini tashkil etish, qoʻshma loyiha ofisini ochish yuzasidan qabul qilingan qarorlar muzokaralarning muhim natijasi boʻldi.
Avtomobilsozlik, kimyo, elektrotexnika, toʻqimachilik, oziq-ovqat sanoati va qishloq xoʻjaligida oʻzaro manfaatli hamkorlikni kengaytirishga kelishib olindi.
Shu maqsadda oʻrta muddatli Savdo-iqtisodiy hamkorlik va sanoat kooperatsiyasini rivojlantirish dasturi qabul qilindi.
Hududlar oʻrtasida tizimli muloqotni rivojlantirish ham Oʻzbekiston-Turkmaniston sherikligiga yangi surʼat bagʻishlaydi. Kuni kecha Buxoroda muvaffaqiyatli oʻtkazilgan birinchi Hududlar forumi hali ishga solinmagan ulkan salohiyat mavjudligini yaqqol koʻrsatdi. Uning yakunida umumiy qiymati 450 million dollardan ziyod boʻlgan aniq shartnoma va kelishuvlar imzolandi.
Parlamentlar – Oliy Majlis va Milliy Kengash oʻrtasidagi hamkorlik samarali kechayotgani mamnuniyat bilan qayd etildi.
Har doimgidek, madaniy-gumanitar hamkorlikni rivojlantirish masalalari muzokaralar diqqat markazida boʻldi. Ilmiy va akademik almashinuvlarni rivojlantirish, innovatsiyalar sohasidagi dasturlarni qoʻllab-quvvatlash yuzasidan kelishuvga erishildi.
Bundan buyon ham Oʻzbekiston va Turkmaniston madaniyati va kino kunlarini oʻtkazib borish, turizm sohasidagi qoʻshma loyihalarni ilgari surishga qaror qilindi.
Muzokaralarda mintaqamizda xavfsizlik va barqarorlikni mustahkamlash masalalari muhokama qilindi. Markaziy Osiyo davlatlari rahbarlari Maslahat uchrashuvlarining muhim ahamiyati qayd etildi.
– Markaziy Osiyoda mintaqaviy jarayonlar va koʻp tomonlama hamkorlikning mustahkamlanishi mintaqadagi barcha mamlakatlarning taraqqiyoti va ravnaqiga xizmat qilishiga qatʼiy ishonaman, — dedi Oʻzbekiston Prezidenti.
Afgʻonistondagi vaziyat yuzasidan fikr almashildi. Davlat rahbarlari ushbu mamlakatning ijtimoiy-iqtisodiy tiklanishi maqsadida bundan buyon ham birgalikda harakat qilishga tayyorligini bildirdilar.
BMT, MDH, IHT, Turkiy davlatlar tashkiloti va boshqa tuzilmalar doirasida faol muloqotlar va oʻzaro qoʻllab-quvvatlashni davom ettirish muhimligi qayd etildi.
Oʻzbekiston Prezidenti Turkmaniston tomonini Markaziy va Janubiy Osiyoning oʻzaro bogʻliqligini mustahkamlash toʻgʻrisida BMT Bosh Assambleyasining maxsus rezolyusiyasini ishlab chiqish va qabul qilishda koʻrsatgan faol koʻmagi uchun minnatdorlik bildirdi.
Davlatimiz rahbari turkmanistonlik hamkasbini Samarqandda oʻtkaziladigan ShHTning navbatdagi sammitida faxriy mehmon sifatida ishtirok etishga taklif etdi.
– Koʻp qirrali Turkmaniston-Oʻzbekiston munosabatlari bugun jadal rivojlanmoqda. Oʻzbekiston bizning muhim siyosiy hamkorimizdir. Bugun savdo-iqtisodiy sheriklik masalalari batafsil muhokama qilindi, uni kengaytirish va diversifikatsiya qilishga ikkala tomon ham tayyor ekani tasdiqlandi, – dedi Serdar Berdimuhamedov.
Yakunda davlat rahbarlari keng koʻlamli strategik sheriklikni rivojlantirish va kengaytirish, uni sifat jihatidan yangi mazmun bilan boyitish, birodar mamlakatlarimiz va xalqlarimiz taraqqiyoti va ravnaqi yoʻlida aniq va samarali natijalarga erishishga qatʼiy intilishlarini taʼkidladilar.
