Turkmanistonga rasmiy tashrif doirasida Oʻzbekiston Respublikasi Prezidenti Shavkat Mirziyoyev ushbu mamlakat Parlamentining yuqori palatasi raisi Gurbanguli Berdimuhamedov bilan uchrashdi, deya xabar beriladi prezident. uz rasmiy veb- saytida.
Davlatimiz rahbari Gurbanguli Berdimuhamedov tomonidan boshlangan keng koʻlamli ijtimoiy-iqtisodiy islohotlar kuchli Turkmanistonni barpo etish uchun mustahkam poydevor boʻlganini alohida qayd etdi.
— Bugun qardosh Turkmaniston milliy birlikni va tarixiy-madaniy anʼanalarni saqlash asosida jadal rivojlanmoqda. Bu butun dunyoda oʻzining yuksak eʼtirofiga sazovor boʻldi, – dedi Shavkat Mirziyoyev.
Gurbanguli Berdimuhamedov birodar mamlakatlarimiz va xalqlarimiz oʻrtasidagi doʻstlik munosabatlarini mustahkamlashga hamda ularni chuqur strategik sheriklik darajasiga olib chiqishga shaxsan hissa qoʻshgani alohida taʼkidlandi.
Oʻzbekiston-Turkmaniston aloqalari oʻzaro hal boʻlmagan masalalardan xoli davlatlararo sheriklikning haqiqiy namunasi ekani mamnuniyat bilan qayd etildi.
Uchrashuvda ikki tomonlama, mintaqaviy va xalqaro hamkorlik masalalarining keng doirasi muhokama qilindi.
Parlamentlarimiz oʻrtasidagi muloqot xalqlarimizning yanada yaqinlashishida eng muhim omil ekani taʼkidlandi.
— Oliy darajada erishilgan kelishuvlarning bajarilishini monitoring qilish uchun parlamentlararo hamkorlik salohiyatidan bundan buyon ham samarali foydalanishimiz lozim, — dedi Shavkat Mirziyoyev.
Uchrashuv soʻngida Gurbanguli Berdimuhamedov Shavkat Mirziyoyevga turkman xalqi alohida qadrlaydigan alabay zotli kuchuk sovgʻa qildi.
