Davlatimiz rahbarining 2017 yil 12 yanvardagi farmoniga asosan tashkil etilgan mazkur iqtisodiy zona mavjud xomashyo va infratuzilmadan samarali foydalanib, qishloq joylarda sanoatni rivojlantirish, ish oʻrinlari ochishda muhim oʻrin tutmoqda.
Bugungi kunda “Urgut” erkin iqtisodiy zonasida qiymati 402 million dollarlikdan ziyod 84 ta investitsiya loyihasi amalga oshirilmoqda. 313 million dollarlik 55 ta loyiha boʻyicha ishlab chiqarish boshlangan, ularda 4 ming 328 ta kishi mehnat qilmoqda. Ushbu korxonalar tomonidan gaz plitalari, yengil sanoat va charm-poyabzal tovarlari, gilamlar, gigiyena vositalari, elektr texnikasi buyumlari kabi 220 turdagi mahsulotlar ishlab chiqarilmoqda. 2020 yilda 1,2 trillion soʻmlik mahsulot tayyorlanib, 30 million dollarlik eksport qilingan.
Davlatimiz rahbari iqtisodiy zona hududidagi “Kamalak Tekstil” korxonasi faoliyati bilan tanishdi. Urgut tumanining Mergancha massivida joylashgan ushbu shirkatda gilam va tafting, kovrolan mahsulotlari, sintetik ip va sunʼiy chim ishlab chiqarilmoqda.
Korxonaga Belgiya, Shveysariya, Avstriya, Fransiya va Germaniya davlatlarining zamonaviy, energiya tejovchi uskuna va jihozlari oʻrnatilgan. 328 ta ish oʻrni yaratilgan.
Oʻtgan yili bu yerda tayyorlangan 170 milliard soʻmlik mahsulotning 59 foizi ichki bozorga, 41 foizi xorijga sotilgan. Joriy yilda 7,5 million dollarlik mahsulot eksport qilinishi rejalashtirilgan.
Mahalliylashtirishni kengaytirish, boshqa tumanlarda ham shunday korxonalar tashkil etib, ish oʻrinlarini koʻpaytirish yuzasidan topshiriqlar berildi.
Prezident “Sam elektro servis” masʼuliyati cheklangan jamiyati mahsulotlarini ham koʻzdan kechirdi.
Korxona “Ideal” brendi ostida yiliga 260 ming dona elektr duxovka, 150 ming dona gaz plitalari va ular uchun qoʻshimcha buyumlar ishlab chiqarish quvvatiga ega. Unga Germaniya, Turkiya va Xitoydan zamonaviy, energiya tejovchi uskuna va jihozlar keltirib oʻrnatilgan.
2020 yilda umumiy qiymati 58 milliard soʻmlik mahsulotlar ishlab chiqarilib, uning 32 foizi xorijga eksport qilingan. Joriy yilda 2 million dollarlik mahsulot eksport qilish koʻzda tutilgan.
Mahsulot turlarini kengaytirish, zamonaviy elektr texnikalari ishlab chiqarish va ularga xizmat koʻrsatish boʻyicha mutaxassislar tayyorlash muhimligi taʼkidlandi.
“Urgut” erkin iqtisodiy zonasida ayni paytda qiymati 90 million dollarlik 29 ta loyiha boʻyicha qurilish-montaj ishlari olib borilmoqda. Mazkur loyihalar ishga tushirilishi natijasida yana 2 mingdan ziyod yangi ish oʻrni yaratiladi.
Bundan tashqari, qiymati 144 million dollarlik 21 ta qoʻshimcha loyiha shakllantirilgan, qiymati 206 million dollarlik 33 ta istiqbolli loyihani amalga oshirish rejalashtirilmoqda.
Davlatimiz rahbari iqtisodiy zona imkoniyatlaridan samarali foydalanish, yangi va istiqbolli loyihalarni koʻpaytirish yuzasidan mutasaddilarga topshiriqlar berdi.
Shu yerda samarqandlik nuroniylar bilan muloqot boʻldi.
