Bugun Pxyonchxandagi qishki Olimpiya oʻyinlarida ishtirok etayotgan hamyurtimiz Komil Toʻxtayev uchun musobaqa yakunlandi.
Hamyurtimiz bugun slalom bahslarida startga chiqdi. Afsuski, hamyurtimiz ilk oraliqdayoq xatoga yoʻl qoʻyganligi sababli diskvalifikatsiya qilindi va marraga yetib bora olmadi.
Taʼkidlab oʻtish lozimki, slalom bahslarida 108 nafar sportchi startga chiqqan boʻlsa, ularning 52 nafari marraga yetib bora oldi. 56 nafar sportchi esa musobaqadagi ishtirokini birinchi chiqishdayoq yakunlashga majbur boʻldi.
Birozdan soʻng slalom bahslarida ikkinchi chiqish boʻlib oʻtadi. Aynan ushbu bahslardan soʻng sovrinli oʻrinlar sohibi aniqlanadi. Birinchi chiqishda diskvalifikatsiya qilingan sportchilar uchun esa Olimpiya oʻyinlari yakunlandi.
Eslatib oʻtamiz, 18 fevral kuni Komil gigant slalom bahslarida ishtirok etgan va umumiy hisobda 2:35.99 natija koʻrsatib, 110 nafar sportchi ichida 52-oʻrinni egallagandi.
Oʻzbekiston Milliy olimpiya qoʻmitasi Matbuot xizmati
