Oʻzbekiston Prezidentining davlat tashrifi doirasida Nur-Sulton shahrida mamlakatimiz elchixonasi yangi binosining ochilish marosimi boʻldi, deya xabar beriladi prezident. uz rasmiy veb- saytida.
Prezident Shavkat Mirziyoyev va Prezident Qasim-Jomart Toqayev ramziy bogʻichni kesib, yangi binoni tantanali ravishda ochdilar.
Ikki mamlakatning davlat madhiyalari yangradi.
Prezidentlar elchixonada yaratilgan sharoitlar bilan tanishdi.
Zamonaviy bino yurtimiz quruvchilari tomonidan barpo etilgan. Xonalar milliy uslubda bezatilgan.
Diplomatik vakolatxona hududida asosiy bino, konsullik boʻlimi, xodimlar uchun uy, diplomatik missiya rahbarining qarorgohi, bolalar va sport maydonchalari joylashgan.
Muzokara xonalari, anjumanlar zalida barcha sharoitlar mavjud. Elchixonaning oʻz kutubxonasi ham bor.
Ish jarayonlarini samarali tashkil etishga alohida eʼtibor qaratilgan, axborot texnologiyalari keng joriy qilingan. Bu yerdagi interfaol uskunalar muzokaralarni onlayn shaklda oʻtkazish imkonini beradi. Konsullik faoliyati uchun “elektron navbat” tizimi oʻrnatilgan, bu yerga keluvchilar maʼlumotlarni interfaol tarzda olish imkoniyatiga ega.
Alohida ehtiyojli odamlar uchun ham zarur sharoitlar yaratilgan.
Bir soʻz bilan aytganda, yangi elchixona binosida barchasi ish sifati va samarasi yuqori boʻlishiga, qardosh mamlakat bilan sheriklikni yanada kengaytirishga qaratilgan.
Shavkat Mirziyoyev va Qasim-Jomart Toqayev elchixonaning Faxriy mehmonlar kitobida qayd yozib qoldirdilar.
