Oʻzbekiston Respublikasi Prezidenti Shavkat Mirziyoyev Rossiya Federatsiyasi Prezidenti Vladimir Putin bilan telefon orqali muloqot qildi, deya xabar beriladi prezident. uz rasmiy veb- saytida.
Rossiya yetakchisi davlatimiz rahbarini saylovda qozonilgan ishonchli gʻalaba bilan dildan qutladi.
Alohida taʼkidlanganidek, ovoz berish natijalari Oʻzbekistonda mamlakatni yanada jadal rivojlantirish, uning xalqaro nufuzini mustahkamlash, fuqarolarning huquq va manfaatlarini himoya qilish yoʻlida amalga oshirilayotgan keng koʻlamli islohotlar siyosati xalq tomonidan keng qoʻllab-quvvatlanayotganini yana bir bor koʻrsatdi.
Suhbat chogʻida ikki tomonlama munosabatlarning dolzarb masalalari koʻrib chiqildi.
Yetakchilar oʻzaro manfaatli savdo-iqtisodiy hamkorlikni kengaytirish, tovar ayirboshlash surʼatini davom ettirish va sanoat kooperatsiyasi loyihalarini ilgari surish masalalariga alohida toʻxtaldilar.
Davlat rahbarlari ishbilarmonlar va hududlar darajasidagi hamkorlikni yanada rivojlantirish, faol gumanitar almashinuvni davom ettirish muhimligini koʻrsatib oʻtdilar.
Mintaqaviy kun tartibidagi dolzarb masalalar yuzasidan ham fikr almashildi.
