Samarqand shahrida “Samarkand Half marathon” xalqaro musobaqasi yakunlandi. Yurtimizda sogʻlom turmush tarzini, turizmni yanada rivojlantirish, sport va sanʼatni uygʻunlashtirish maqsadlari asosida tashkil qilingan ushbu xayriya marafonida 23 ga yaqin mamlakatdan 1100 nafardan ortiq sportchi va havaskor ishtirokchilar qatnashdi.
Oʻzbekiston Respublikasi Bosh vaziri oʻrinbosari Aziz Abduhakimov va Samarqand viloyati hokimi E.Turdimov marofon qatnashchilarini tabriklab, musobaqaning ahamiyati haqida gapirdi.
Ushbu marafonni oʻtkazish uchun Samarqand shahri tanlab olingani bejizmasligi, sportchilar reglamentda belgilab qoʻyilgan masofalarni shaharning markaziy koʻchalari boʻylab bosib oʻtishi, bu esa Samarqandning turizm sohasidagi imkoniyatlarini keng ochib berish uchun yana bir qulay imkoniyat yaratishini taʼkidlashdi.
Ikki km.ga yugirishda hamyurtlarimiz Xurshid Ahmadaliyev va Marjona Baratovalarga birinchilik nasib qildi, Oʻn 10 km.ga chopishda qozogʻistonlik Dmitriy Ivanchikov va Tatyana Neroznak birinchi oʻrinni egallashdi. Yigirma bir km.ga yugirishda yurtimiz vakillari Shohruh Davlatov va Nurxon Muhriddinova gʻolib boʻlishdi.
Marafon gʻoliblari tashkilotchilarning pul mukofoti va esdalik sovgʻalari bilan taqdirlandi. Shuningdek, 2 va 3-oʻrinni egallaganlar, marafonning faol ishtirokchilari, eng yosh va eng keksa marafonchilar ham munosib ragʻbatlantirildi.
