Tadbirkorlar va ishbilarmonlar harakati – Oʻzbekiston Liberal-demokratik partiyasidan Oʻzbekiston Respublikasi Prezidentligiga nomzod Shavkat Mirziyoyev 8 oktyabr kuni Termiz shahrida surxondaryolik saylovchilar bilan uchrashuv oʻtkazdi, deya xabar beriladi prezident. uz rasmiy veb- saytida.
Tadbirni nomzodning Surxondaryo viloyati boʻyicha ishonchli vakili A.Eshmuratov ochdi. Soʻz Shavkat Mirziyoyevga berildi.
— Surxon – koʻhna sivilizatsiyalar, boy tarix va madaniyatni mujassam etgan qadimiy zamin. Tarixda Boxtar, Tohariston, Chagʻoniyon kabi davlatlar, Kushondek buyuk imperiyalar aynan shu hududda gullab-yashnagan, — dedi Shavkat Mirziyoyev.
Bugungi kunda ham viloyat izchil rivojlanayotgani, shahar, qishloq va mahallalar obod boʻlib, odamlarning hayot darajasi oʻsib borayotgani taʼkidlandi.
Nomzod oʻzining saylovoldi dasturi bilan tanishtirdi. Bu dastur iqtisodiyot, tadbirkorlik, qishloq xoʻjaligi, taʼlim, tibbiyot, hududlar rivoji, davlat boshqaruvi, qonun ustuvorligi, tashqi siyosat, madaniyat sohalariga oid oʻnta ustuvor yoʻnalishni qamrab olgan.
Aholining yashash sharoitlarini yaxshilash birinchi ustuvor vazifa sifatida belgilangan. Avvalambor, 2022-2026 yillarni Surxondaryoda aholini toza ichimlik suvi bilan taʼminlash besh yilligi deb eʼlon qilib, 1 ming 700 kilometr tarmoqlar qurish rejalashtirilgan. Toʻpalang suv omboridan Termizgacha tortiladigan 361 kilometrlik magistral suv tarmogʻi shuning bir qismi boʻladi.
Shuningdek, uy-joylar, yoʻl va koʻpriklar qurish, elektr energiyasi taʼminotini yaxshilash choralari ham aytildi.
Viloyatda meva-sabzavotlar eksporti soʻnggi uch yilda 2 barobar oshib, 100 million dollarga yetgan. Shavkat Mirziyoyev bu sohadagi salohiyatni toʻliq ishga solib, ushbu koʻrsatkichni kamida 500 million dollarga yetkazish mumkinligini taʼkidladi.
Nomzod dasturidagi yana bir muhim yoʻnalish – sanoatni rivojlantirib, eksport va investitsiya hajmlarini koʻpaytirish. Jumladan, viloyat iqtisodi oʻsishiga turtki beradigan 10 ta mega-loyihani ishga tushirib, jami 5,1 milliard dollarlik investitsiyalar oʻzlashtirish va 22 mingta yangi ish oʻrinlari yaratish rejalashtirilgan.
Umuman, kelgusi besh yilda sanoat tarmoqlarida 6,6 milliard dollarlik 5 mingdan ziyod investitsiya loyihasi amalga oshirilishi moʻljallangan.
Ijtimoiy sohalarni rivojlantirish, aholi salomatligini mustahkamlash, taʼlim sifatini tubdan yaxshilash masalalariga ham toʻxtalib oʻtildi. Yangi oilaviy shifokorlik punktlari va oilaviy poliklinikalar ochish, tibbiyot muassasalarini taʼmirlash, maktabgacha taʼlim muassasalari va maktablar sigʻimini oshirish, oliy taʼlim qamrovini 25 foizdan 50 foizga yetkazish rejalashtirilgani maʼlum qilindi.
Yaqin besh yilda Surxondaryo viloyatini iqtisodiy va ijtimoiy rivojlantirishga 50 trillion soʻm yoʻnaltirish va jami 320 mingta yangi ish oʻrni yaratish maqsad qilingani taʼkidlandi.
– Kelgusi besh yilda yurtimizda, jumladan, Surxondaryo viloyatida amalga oshiradigan barcha islohotlarni “inson – jamiyat – davlat” degan mutlaqo yangicha tizim asosida tashkil etamiz. Islohotlar natijasi, avvalo, har bir inson, har bir oila va mahalla hayotida yaqqol sezilishi uchun barcha imkoniyatlarimizni toʻla safarbar etamiz, – dedi Shavkat Mirziyoyev.
Uchrashuvda partiya aʼzolari, tuman studiyalaridagi saylovchilar bilan samimiy muloqot boʻldi. Ular viloyatni rivojlantirish, joylardagi muammolarni hal etish boʻyicha oʻz takliflarini ilgari surdi, boʻlajak Prezident saylovida Shavkat Mirziyoyev nomzodini qoʻllab-quvvatlashini taʼkidladi.
