Oʻzbekiston Respublikasi Prezidenti Shavkat Mirziyoyev mamlakatimizga rasmiy tashrif bilan, shuningdek, Shanxay hamkorlik tashkilotiga aʼzo davlatlar Hukumat rahbarlari kengashining 18-majlisida ishtirok etish uchun kelgan Xitoy Xalq Respublikasi Davlat kengashi Bosh vaziri Li Kesyanni qabul qildi, deya xabar beriladi prezident. uz rasmiy veb- saytida.
Davlatimiz rahbari mehmonni samimiy qutlab, Oʻzbekiston bilan Xitoy oʻrtasidagi doʻstlik va har tomonlama strategik sheriklik munosabatlari izchil mustahkamlanib borayotganiga katta mamnuniyat bildirdi.
Li Kesyan, oʻz navbatida, Oʻzbekiston Prezidentiga iliq mehmondoʻstlik uchun samimiy minnatdorlik bildirdi hamda XXR Raisi Si Szinpinning salomi va eng ezgu tilaklarini yetkazdi.
Uchrashuvda ikki davlat rahbarlarining samarali muzokaralari konstruktiv siyosiy muloqotni kengaytirish va barcha sohalarda koʻp qirrali amaliy hamkorlikni rivojlantirish uchun mustahkam zamin yaratgani alohida taʼkidlandi.
Oliy darajada erishilgan kelishuvlar va imzolangan bitimlarni soʻzsiz amalga oshirish, ikki tomonlama savdoning jadal oʻsishini taʼminlash, shuningdek, infratuzilmani rivojlantirish, energetika, sanoat, qishloq xoʻjaligi, transport, axborot-telekommunikatsiya texnologiyalari va boshqa sohalarda ustuvor loyihalarni birgalikda ilgari surish zarurligi qayd etildi.
Madaniy-gumanitar yoʻnalishda, avvalo fan, taʼlim, innovatsiyalar va turizm yoʻnalishlaridagi aloqalarni mustahkamlashga alohida eʼtibor qaratildi.
Uchrashuvda Shanxay hamkorlik tashkiloti doirasidagi hamkorlikni kengaytirish masalalari muhokama qilindi. Xususan, iqtisodiyot, investitsiyalar va transport kommunikatsiyalari sohalarida tashkilotga aʼzo barcha davlatlar uchun manfaatli boʻlgan yirik loyihalarni amalga oshirish dolzarb ekani taʼkidlandi.
Xalqaro va mintaqaviy ahamiyatga molik masalalar yuzasidan ham fikr almashildi.
XXR Davlat kengashi Bosh vaziri Xitoy mamlakatlarimiz va xalqlarimiz manfaatlari yoʻlida koʻp qirrali sheriklik munosabatlarini yanada rivojlantirish va mustahkamlashga koʻmaklashishga tayyor ekanini tasdiqladi.
