Oʻzbekiston Prezidenti Shavkat Mirziyoyev 29 avgust kuni Rossiyaning «USM Holding» aksiyadorlik jamiyati taʼsischisi va rahbari Alisher Burhonovich Usmonovni «El-yurt hurmati» ordeni bilan taqdirlash toʻgʻrisidagi farmonni imzoladi. Farmon matni «OʻzA»da eʼlon qilindi.
Hujjatda qayd etilishicha, taniqli hamyurtimiz Alisher Usmonov Oʻzbekiston Respublikasi va Rossiya Federatsiyasi oʻrtasida iqtisodiy, ijtimoiy, madaniy-maʼrifiy aloqalarni mustahkamlash, mamlakatimizda yirik investitsion loyihalarni muvaffaqiyatli amalga oshirish ishlariga qoʻshgan katta hissasi, xalqimizning milliy qadriyati va boy tarixiy yodgorliklarini qayta tiklash va asrab-avaylash maqsadida Oʻzbekistonda diniy-madaniy ahamiyatga ega boʻlgan obyektlarni barpo etish borasidagi faol ishtiroki, Vataniga yoshlar uchun oʻrnak boʻladigan darajadagi samimiy muhabbati hamda respublikamizda turizm salohiyatini va sport sohasini rivojlantirishdagi hamkorligi uchun mukofotlangan.
