Sirdaryo tumanida viloyat sanoat korxonalarida ishlab chiqarilayotgan mahsulotlar namoyish etildi.
Shavkat Mirziyoyev «Crocus uz compozit» korxonasining irrigatsiya lotoklari ishlab chiqarish loyihasiga alohida eʼtibor qaratdi. Joriy yilning dekabr oyida foydalanishga topshirilishi rejalashtirilgan korxonada kompozit materialdan yiliga 180 ming metr lotok va quvurlar ishlab chiqariladi. 150 kishi ish bilan taʼminlanadi.
Prezident sugʻorishda isrofgarchilik koʻpligi, bunday sifatli lotoklar suvni tejash va undan samarali foydalanishda dolzarb ahamiyatga ega ekanini taʼkidladi.
«Ideal asr» korxonasida ishlab chiqarilayotgan gaz tejash uskunalarining ahamiyatiga toʻxtalib, bunday mexanizmlarni hamma joyda oʻrnatish zarurligi qayd etildi.
Sirdaryo tumanidagi «Wang da group» qoʻshma korxonasida ishlab chiqarilayotgan metall mahsulotlar, Guliston shahrida «Zinnur» brendi ostida tayyorlanayotgan krossovkalar Prezidentimizda katta taassurot qoldirdi.
