Londonda oʻn kun mobaynida davom etgan “Global Chess League “Tech Mahindra” turniri finalida Nodirbek Abdusattorov dona surgan “PBG Alaskan Knights” hamda safida Javohir Sindorov boʻlgan “Triveni Continental Kings” jamoalari roʻbaroʻ keldi.
Kecha oʻtkazilgan soʻnggi tur bahslarida muddatidan avval final yoʻllanmasiga ega chiqqan “PBG Alaskan Knights” vakillari Hikaru Nakamura boshchiligidagi “American Gambits” jamoasini 14:5 hisobida magʻlub etdi. Ushbu qarama-qarshilikda Abdusattorov qora donalarda polshalik Yan-Krishtoff Duda bilan murosa yoʻlini tanladi.
Ikkinchi finalchi jamoani aniqlashi lozim boʻlgan “Alpine SG Pipers” –“Triveni Continental Kings” kurashida hamyurtimiz Javohir Sindorov qahramonga aylandi. Aynan uning soʻngi uchrashuvdagi gʻalabasi “Triveni Continental Kings”ni finalga olib chiqdi. Ushbu oʻyinda Javohir belgiyalik grossmeyster Daniel Dardani 3:0 hisobida taslim etdi. Sardorlar oʻrtasidagi “duel”da Magnus Karlsen Alireza Firuzjadan 4:0 hisobida yengdi. Shunday boʻlsa-da Sindorovning gʻalabasi evaziga “Triveni Continental Kings” Magnus Karlsen sardorligidagi “AlpiAlpine Sg Pipers” jamoasini 9:7 hisobida dogʻda qoldirdi va ikkinchi finalchiga aylangandi.
“Triveni Continental Kings” – “PBG Alaskan Knights” oʻrtasidagi final oʻyinining sardorlar bahsida Aliriza Firuzja Anish Girini yenggan boʻlsa, ushbu liga musobaqalari davomidagi uchta oʻyinda xitoylik Vey Yini taslim qilgan Abdusattorov finalda kutilmaganda imkoniyatni boy berib qoʻydi. Javohir Sindorov boʻlsa Abdusattorovning jamoadoshi Nixal Sarin bilan durangga erishdi.
Shu tariqa “Global Chess League “Tech Mahindra” turniri bosh sovrini – 500 ming AQSH dollari Javohir Sindorovning “Triveni Continental Kings” jamoasiga nasib qildi. 2-oʻrin va mukofot jamgʻarmasida belgilangan 250 AQSH dollari Nodirbek Abdusattorovning «Alaskan Knights» jamoasiga tegishli boʻldi. Shuningdek, turnirda 3-4-oʻrinlardan joy olgan jamoalar 100 ming AQSH dollarini qoʻlga kiritgan vaziyatda 5-6-oʻrin sohibi boʻlgan jamoalar oʻrtasida mukofot jamgʻarmasining 50 ming AQSH dollari taqsimlanadigan boʻldi.
Toʻlqin Roʻziyev, OʻzA
