Termiz shahrida Surxondaryo viloyati mahalliy kengash deputatlari, tadbirkor va fermerlar, nuroniylar, yoshlar, jamoatchilik faollari ishtirokida yigʻilish boʻlib oʻtdi, deya xabar beriladi prezident. uz rasmiy veb- saytida.
Oʻzbekiston Respublikasi Prezidenti Shavkat Mirziyoyev viloyatni kompleks rivojlantirish, “mahallabay” tizimda aholi hayotini yaxshilash boʻyicha ustuvor vazifalarni koʻrsatib oʻtdi.
— Sizlar bilan uchrashib, muammolarni hal etish uchun kelganmiz. Bu tashrifga anchadan beri tayyorgarlik koʻrdik. Toshkentga bogʻliq masala qolmadi. Endi berilgan mablagʻ va tizimni aql bilan ishlatib, joylarda manzilli bajarish kerak. Men kuyib-pishganim bilan sizlar jon kuydirmasangiz, xalqning biri ikki boʻlmaydi. Surxondaryoning ichki imkoniyatlaridan foydalansak, odamlarning dardiga darmon boʻlish uchun hamma sharoit bor. Buning uchun sektor rahbarlari fidoyi boʻlib, joyiga tushib, “mahallabay” tizimda ishlashi kerak, — dedi Shavkat Mirziyoyev.
Tadbirkorlikni rivojlantirish va aholi bandligini taʼminlash birinchi yoʻnalish sifatida belgilandi.
Davlatimiz rahbari Bandixon, Qiziriq, Muzrabot va Sherobod tumanlari rivojiga turtki berish maqsadida ushbu tumanlarda yangidan tashkil etiladigan tadbirkorlik subyektlarini yer, mol-mulk, kichik korxona aylanmasidan olinadigan soliqlar, yakka tartibdagi tadbirkorlarning qatʼiy miqdordagi daromad soligʻidan 2024 yil 1 yanvarga qadar ozod qilishni taklif qildi.
Surxondaryo viloyatida 2021-2022 yillarda umumiy qiymati 16 trillion 800 milliard soʻm boʻlgan 1 ming 177 ta hududiy investitsiya loyihalari amalga oshirilishi qayd etildi. Ularning natijasida 25 mingta yangi ish oʻrni tashkil etish moʻljallangan.
— Viloyatda qurilish materiallari, yengil, charm, oziq-ovqat, elektrotexnika, mahalliy sanoat kabi “drayver” sohalarni jadal rivojlantirish va yangi loyihalarni koʻpaytirish zarur, — dedi Prezident.
Shu maqsadda, qurilish materiallarini eksport qilishda transport xarajatlari va kredit foizlarini qisman qoplab berish, import oʻrnini bosuvchi maishiy tovarlar ishlab chiqaruvchi mahalliy sanoat korxonalariga xomashyo va yarim fabrikatlarni import qilishda imtiyozlar berish boʻyicha takliflar bildirildi.
Boysun, Sariosiyo, Sherobod tumanlarini qurilish materiallari, Qiziriqni yengil sanoat, Oltinsoyni oziq-ovqat, Angorni charm, Bandixon va Muzrabot tumanlarini mahalliy sanoatga ixtisoslashtirib, klasterlar tashkil etish zarurligi taʼkidlandi. Xususan, Sariosiyoda qurilish materiallari ishlab chiqarish innovatsion industrial zonasi tashkil etilishi aytildi.
Investitsiya loyihalarining 3 trillion 121 milliard soʻmligi qishloq xoʻjaligi sohasiga oid. Xususan, 1 ming gektar issiqxonalar tashkil etishga 950 milliard soʻm yoʻnaltiriladi. Oltinsoy, Uzun, Bandixon, Denov, Jarqoʻrgʻon, Muzrabot, Termiz va Sariosiyo tumanlarida zaytun plantatsiyalari, Sherobod, Muzrabot va Qiziriqda anorzorlar barpo etiladi.
Surxondaryo misolida tomorqadan samarali foydalanish boʻyicha xonadon egasi, tayyorlovchi korxona, qayta ishlovchi va eksportchilarni bogʻlovchi yaxlit tizim yaratish vazifasi qoʻyildi.
Joriy yilda jamoat ishlari, kooperativ va tomorqa xoʻjaligida 50 ming nafar ishsizning bandligini taʼminlash vazifasi qoʻyildi. Bunga Bandlikka koʻmaklashish va Jamoat ishlari jamgʻarmalaridan 32 milliard soʻm ajratilishi belgilandi.
Davlatimiz rahbari ijtimoiy infratuzilmani rivojlantirish masalalariga ham alohida toʻxtaldi.
Bu yil viloyatda “Obod qishloq” va “Obod mahalla” dasturi doirasida 483 ta qishloq va mahallada obodonlashtirish ishlari olib borilmoqda. Buning uchun 1,6 trillion soʻm mablagʻ ajratilgan.
1 ming 230 kilometr yoʻllar taʼmirlanishi, yana ming kilometr elektr tarmogʻi tortilishi qayd etildi.
Prezident yaqin 2-3 yilda viloyatda 1,5 million aholining ichimlik suvi muammolarini toʻliq hal qilish, buning uchun “Toʻpalang” suv omboridan 400 kilometr magistral tarmoqlar tortish boʻyicha loyiha ishlab chiqish zarurligini taʼkidladi.
Moliya vazirligiga viloyatda ijtimoiy, kommunikatsiya va yoʻl infratuzilmasini rivojlantirishga 2021 yil uchun qoʻshimcha 200 milliard soʻm ajratish boʻyicha koʻrsatma berildi.
Yigʻilishda shahar va tuman studiyalaridagi aholi bilan ochiq muloqot boʻldi.
