Uzoq yillar davomida Toshkent shahrida koʻp qavatli uylar qurilmagani oqibatida aholi orasida uy-joyga boʻlgan ehtiyoj ortib ketgan, deya xabar beriladi prezident. uz saytida.
Prezidentimiz tashabbusi bilan 2017 yildan boshlab mamlakatimizning barcha shaharlarida turar-joyga muhtoj oilalar uchun arzon va har tomonlama qulay uy-joylar qurish boshlandi. Jumladan, Toshkent shahrining Sergeli tumanida oʻtgan yili 102 ta koʻp qavatli arzon uylar qurilib, 4 ming 88 ta oila oʻz uyiga ega boʻldi.
Joriy yilda Toshkent shahrida 28 ming xonadonli 638 ta koʻp qavatli uylar qurilmoqda. Ularning 334 tasi arzon uy-joylar boʻlib, bu oʻtgan yilga nisbatan 3 barobar koʻpdir.
Jumladan, Sergeli tumani “Choshtepa” mahalla fuqarolar yigʻini hududida chet ellik investorlar ishtirokida 72 ta 7 qavatli uy qurilishi boshlangan.
Prezident Shavkat Mirziyoyev mazkur uylar loyihasi bilan tanishdi.
«Toshkentda hech qachon bir yilda 638 ta koʻp qavatli uy qurmaganmiz. Bitta mavzeda 72 ta 7 qavatli uy rejalashtirmaganmiz. Bu poytaxtimizdagi bunyodkorlik, xalqimiz talabini qondirish yoʻlidagi ishlarimiz miqyosidan bir dalolat. Tasavvur qilinglar, bu uylar qancha odamlarga ishonch, qancha oilalarga fayz-baraka olib keladi» dedi Shavkat Mirziyoyev.
Davlatimiz rahbari uylar qurishning zamonaviy yutuqlarini oʻzlashtirish, bunday uylarni boshqa joylarda ham loyihalashtirish boʻyicha topshiriqlar berdi.
