Yangiyoʻl tumanida 14 oktyabr kuni Toshkent viloyatidagi muhim loyihalarni ishga tushirish va qurilishini boshlash marosimi boʻlib oʻtdi.
Toshkent viloyati mamlakatimiz iqtisodiyotida strategik ahamiyatga ega. Bu hudud va azim poytaxtimiz salohiyati oʻzaro bogʻliq va bir-birini toʻldirib keladi.
Soʻnggi besh yilda Toshkent viloyatida sanoat hajmi 1,5 barobarga koʻpayib, 107 trillion soʻmni tashkil etgan, mahalliy eksport hajmi 3,5 karra oshib, qariyb 1 milliard dollarga yetgan.
Qulay ishbilarmonlik va investitsiya muhiti sarmoyalar hajmini oshirish, ilgʻor texnologiyalarni joriy etishga xizmat qilmoqda. 2018 yilda viloyatda jami boʻlib 20 million dollar investitsiya oʻzlashtirilgan boʻlsa, oʻtgan yili bu raqam 1 milliard dollarga yetgan. Chet el kapitali ishtirokidagi korxonalar soni ham yil sayin ortib, hozirda 1 ming 700 tani tashkil etmoqda.
Bugungi kunda 20 milliard 360 million dollarlik 91 ta xorijiy, 4 yarim milliard dollarlik 28 ta mahalliy investitsiya loyihalari boʻyicha ish olib borilmoqda.
Prezident Shavkat Mirziyoyev marosim doirasidagi loyihalarning ahamiyatiga toʻxtalib oʻtdi.
Xususan, Olmaliq shahrida 1 milliard dollar investitsiya hisobidan 227 gektar maydonda “Buyuk ipak yoʻli” maxsus sanoat texnoparki quriladi. U yerda elektrotexnika, toʻqimachilik, qurilish materiallari, farmatsevtika kabi yoʻnalishlarda 100 ga yaqin korxona joylashtiriladi. 3 mingta yangi ish oʻrni yaratilib, yiliga 5 trillion soʻmlik mahsulot ishlab chiqariladi va 300 million dollarlik eksport imkoniyati paydo boʻladi.
Yuqori Chirchiq tumanida 350 million dollar evaziga 69 gektar maydonda toʻqimachilik sanoat parki tashkil etiladi. Bu majmuada 20 dan ortiq ip-kalava, mato toʻqish va boʻyash, tayyor tekstil mahsulotlari ishlab chiqarish korxonalari joylashtiriladi.
Mamlakatimizda oziq-ovqat mahsulotlari yetishtirish va eksport qilish izchil koʻpayib bormoqda. 2030 yilgacha oziq-ovqat ishlab chiqarishni 2 barobar, eksportini 5 barobar va qoʻshilgan qiymat darajasini 3 marta oshirish maqsad qilingan. Bunga erishishda, hech shubhasiz, Toshkent viloyatining hissasi katta.
Jumladan, Yangiyoʻl tumanida yiliga 50 ming tonna mineral oʻgʻit va kimyoviy vositalar, Qibrayda yuqori sifatli eksportbop oziq-ovqat mahsulotlari tayyorlash korxonalari ishga tushirilmoqda.
Toshkent viloyati energetika sohasida ham katta salohiyatga ega boʻlib, bu yerda 5,7 gigavattli quvvatlar mavjud. Bu miqdorni oshirish maqsadida 1,5 milliard dollarlik 800 megavattdan ortiq 6 ta loyiha amalga oshirilmoqda.
Yashil energetikani rivojlantirish bilan birga, yurtimizda energetika tizimi barqarorligini saqlash boʻyicha ham koʻp ishlar qilinmoqda. Shuning uchun 2030 yilgacha umumiy quvvati 4 ming 100 megavattli elektr energiyasini saqlash tizimlarini barpo etish rejalashtirilgan.
Xitoyning yetakchi kompaniyalari ishtirokida barpo etiladigan 3 ta loyiha bunda muhim oʻrin tutadi. Avvalo, “Chayna Datang” kompaniyasi bilan Boʻka tumanida qiymati 240 million dollarlik quyosh elektr stansiyasi barpo etiladi. Bu stansiyada yiliga 576 million kilovatt soat yoki 240 ming xonadon uchun yetarli elektr energiyasi olinadi. Natijada viloyatda generatsiya quvvatlari 6,5 gigavattga, elektr energiyasi ishlab chiqarish yiliga 24 milliard kilovatt soatga yetkaziladi.
Yana ikkita loyiha – “China Energy Overseas Investment” kompaniyasi bilan hamkorlikda Parkent va Piskent tumanlarida quriladigan 220 million dollarlik, 200 megavattli energiya saqlash tizimlaridir. Ular kunning tigʻiz paytlarida uzilishga yoʻl qoʻymaslik va isteʼmolchilarni elektr bilan ishonchli taʼminlash imkonini beradi.
Soʻnggi yillarda yurtimizda 630 million dollar investitsiya hisobidan 400 megavattdan ortiq yangi gidroelektr stansiyalari barpo etilib, ularning quvvati 2,2 gigavattga yetkazildi.
Tadqiqotlar shuni koʻrsatmoqdaki yurtimizda 3 ming 280 megavatt quvvatga ega boʻlgan 44 ta GES qurish imkoniyati mavjud. Ayniqsa, Toshkent viloyatida gidroenergetika boʻyicha juda katta salohiyat bor.
Hozirda viloyatda umumiy quvvati 1 ming 330 megavatt boʻlgan 25 ta gidro elektr stansiyasi mavjud. Bu respublikamizdagi jami gidroenergetika quvvatining 60 foiziga tengdir.
Bugungi kunda qiymati 880 million dollar va quvvati 340 megavatt boʻlgan yana 4 ta GES qurilmoqda. Shuningdek, 2028 yilgacha viloyatda umumiy quvvati qariyb 2 ming 400 megavatt boʻlgan, 4 milliard 800 million dollarlik 23 ta loyiha amalga oshiriladi.
Marosimda shundan ikkitasi – Ohangaron tumanida barpo etilgan 2,5 megavattli kichik GES hamda Boʻstonliq tumanida qurilgan 1,5 megavattli Ugam kichik GESi ishga tushirilmoqda. Mazkur quvvatlar yiliga 18 million 400 ming kilovatt soat “yashil” energiya ishlab chiqaradi va 7 ming 600 ta xonadonni elektr energiyasi bilan taʼminlaydi.
Shavkat Mirziyoyev yurtimizga investitsiya kiritayotgan xorijiy kompaniyalarga minnatdorlik bildirib, ishlariga muvaffaqiyat tiladi.
Ramziy tugma bosilib, mazkur 9 ta loyihaning qurilishi va faoliyatiga start berildi. Ularning umumiy qiymati 2 milliard dollardir.
