Prezident Shavkat Mirziyoyev raisligida 22 aprel kuni hududlarda xizmat koʻrsatish sohasi yoʻnalishlarini rivojlantirish masalalari boʻyicha videoselektor yigʻilishi oʻtkazildi, deya xabar beriladi prezident. uz rasmiy veb- saytida.
Xizmat koʻrsatish sohasi keng qamrovliligi bilan iqtisodiyotda, aholi hayotida muhim oʻrin tutadi. Bu sohada yangi ish oʻrinlarini kam xarajat bilan va tez muddatda tashkil etish mumkin. Aholi daromadlarining real oʻsishi ham avvalo xizmatlar rivojida seziladi.
Koronavirus pandemiyasi bu sohaga salbiy taʼsir koʻrsatdi. Shu bois, tadbirkorlarga 24 ta turdagi soliq imtiyozlari, subsidiya va boshqa preferensiyalar taqdim etish orqali 35 trillion soʻmlik koʻmak berildi. Bu yengilliklar ham tadbirkorlar, ham banklar uchun katta imkoniyat boʻldi.
Masalan, oʻtgan yili tadbirkorlikni rivojlantirish dasturlari doirasida xizmat sohasiga 1 trillion soʻm imtiyozli kredit resurslari berilgan. Bundan tashqari, tijorat banklari oʻz mablagʻlari hisobidan qoʻshimcha 14 trillion soʻm kreditlar ajratgan. Keng imtiyozlar berilgani natijasida servis sohalarida oʻzini oʻzi band qilgan 500 ming nafar fuqaro rasmiy roʻyxatdan oʻtgan.
Joylarda tadbirkorlar bilan oʻtkazilgan uchrashuvlarda yangi xizmat turlarini yoʻlga qoʻyish boʻyicha murojaatlar, tashabbuslar koʻp boʻlmoqda. Ular asosida viloyat, tuman va shahar hokimliklari joriy yilda xizmatlar sohasida 59 trillion soʻmlik 42 mingta yangi loyihani amalga oshirish, 150 mingta doimiy ish oʻrni yaratish boʻyicha rejalar belgilagan.
Yigʻilishda Prezident har bir loyiha ijrosini nazoratga olib, tadbirkorlarga koʻmaklashish, shu bilan birga, yangi loyihalarni shakllantirib borish yuzasidan koʻrsatmalar berdi.
Har bir hududning oʻziga xosligidan kelib chiqib, xizmatlarni kengaytirish, yangi xizmat turlarini yoʻlga qoʻyish, ilgʻor tajribalar va namunaviy loyihalarni joriy etish boʻyicha yangi metodologiya yaratish zarurligi taʼkidlandi. Buning uchun, Oʻzbekiston milliy banki huzurida xizmatlarni rivojlantirish boʻyicha loyiha-tahliliy markazi tashkil etiladi va barcha viloyatlardagi filiallarida uning boʻlimlari ochiladi. Ularda aholiga namunaviy tayyor biznes loyihalari taqdim etiladi, kasbga oʻqitishdan biznesni yoʻlga qoʻyishgacha boʻlgan kompleks xizmatlar koʻrsatiladi.
Davlatimiz rahbari loyihalarni moliyaviy taʼminlash masalasiga alohida toʻxtaldi.
Hisob-kitoblarga koʻra, bu yil xizmatlar sohasi uchun banklar tomonidan kamida 18 trillion soʻm kreditlar yoʻnaltiriladi.
Bundan tashqari, davlat tomonidan tijorat banklari orqali qoʻshimcha 300 million dollar ajratiladi. Shundan 150 million dollari 1 iyulgacha joylarga yetib boradi.
Viloyat, tuman, shahar hokimlari, sektor rahbarlari, mahallaga biriktirilgan masʼullar bilan birga “mahalla – tuman – bank” prinsipi asosida loyihalar roʻyxatini shakllantiradi. Bunda, har bir mahallada kamida 20 turdagi, tuman va shaharda kamida 70 ta turdagi xizmatlar boʻlishi nazarda tutiladi.
Shuningdek, Milliy bank tomonidan 28 ta yirik va oʻrta shaharlarda turizm, transport, tibbiyot, taʼlim xizmatlari hamda yirik savdo komplekslari tashkil etish uchun qoʻshimcha 200 million dollar mablagʻ jalb qilinadi.
Umuman aytganda, byudjetdan va Milliy bank tomonidan xizmat koʻrsatish sohasiga jami 500 million dollar yoki 5,5 trillion soʻm yoʻnaltiriladi.
– Topshiriq berishdan oldin sharoit yaratayapmiz, pullar ajratayapmiz. Birgina xizmatlar sohasiga 500 million dollar beryapmiz. Buni agar halol-pok ishlatsak, necha ming ishchi joy paydo boʻladi. Har bir vazir vatanparvar boʻlib, “oʻzining aravasini oʻzi tortib”, berilgan bir soʻm pulni qadrlab, joyiga yetkazsa, odamlar ishonadi, – dedi Shavkat Mirziyoyev.
Buning uchun vazirlik va idoralar rahbarlari oʻz yoʻnalishida xizmatlar rivoji uchun harakat qilishi zarurligi qayd etildi.
– Vazirlar oʻz sohasida xususiy sektor faoliyati uchun huquqiy baza yaratishi, ruxsat berish talablarini soddalashtirib, tadbirkorlikka yoʻl ochishi zarur. Qayerda davlat korxonasi, qaysi faoliyat boʻyicha davlat-xususiy sheriklik yoki xususiy sektor boʻlishi aniq qilib belgilanishi kerak, – dedi Prezident.
Misol uchun, oxirgi 2 yilda 6 mingga yaqin koʻp qavatli uylar qurilgan. Ularning ekspluatatsiyasi boʻyicha boshqaruv kompaniyalari tashkil etish, mavzelar ichida turli xizmatlarni yoʻlga qoʻyish mumkin.
Yoki, xavfsizlik talablarini qoʻygan holda, aeroport, temir yoʻl va avtovokzallar hududlarida, magistral yoʻllar yoqasida savdo va xizmat koʻrsatish obyektlarini tashkil etish tadbirkorlarni daromad, aholini ish bilan taʼminlaydi.
Axborot sohasida xususiy sektor ishtirokini yanada kengaytirish, narxlarni arzonlashtirish va sifatini oshirish hisobiga aloqa va internet xizmatlari hajmini kamida 2 baravarga, dasturlashni 3 baravarga oshirish imkoniyati bor.
Xuddi shu kabi, barcha vazirlik va idoralar tizimida foydalanish zarur boʻlgan yoʻnalishlar koʻrsatib oʻtildi.
Servisni aholiga yaqinlashtirish maqsadida mahallalarda yengil konstruksiyalardan xizmatlar markazi barpo etish muhimligi taʼkidlandi. Shuningdek, 28 ta shahar hamda aholisi 150 mingdan koʻp boʻlgan tuman markazlarida savdo va xizmatlar uchun maxsus koʻchalar tashkil etilishi belgilandi. Ularda 100 mingta tadbirkorlik subyektlarini joylashtirish imkoni mavjud.
Xizmat koʻrsatishda eng muhim masala – bu manzilni toʻgʻri tanlash. Shu bois Qurilish vazirligiga viloyat hokimlari bilan birga, savdo va xizmat koʻrsatishga ixtisoslashgan koʻchalar hamda markazlarning joyini tanlab, loyihasini ishlab chiqish, lotlarga boʻlib, tanlov asosida savdoga chiqarish topshirildi. Xavfsizlik choralarini koʻrib, ushbu savdo va xizmat koʻrsatish obyektlarining kunu tun ishlashiga ruxsat berilishi ham mumkin.
Koʻp tarmoqli shifoxonalar va uning atrofida xususiy sheriklik asosida tibbiyot klasterlari, oliy oʻquv yurtlari hududida xorijiy tillar, tayyorlov va kasbga oʻrgatish kurslari tashkil etish boʻyicha ham topshiriqlar berildi.
Yigʻilishda mutasaddilar joylardagi salohiyatni yuzaga chiqarish, tashabbuskorlarni qoʻllab-quvvatlab, xizmatlar hajmini oshirish chora-tadbirlari yuzasidan axborot berdi.
