Prezident Shavkat Mirziyoyev Fargʻona shahrida qurilayotgan “Yangi Oʻzbekiston” massivini borib koʻrdi, deya xabar beriladi prezident. uz rasmiy veb- saytida.
Aholiga munosib yashash sharoitlari yaratish, ijtimoiy infratuzilmani rivojlantirish davlatimiz rahbarining doimiy eʼtiborida. Shu bois barcha hududlarda bunday loyihalar amalga oshirilmoqda.
Prezidentimiz 2022 yil va oʻtgan yilda Fargʻona shahridagi ushbu massiv qurilishini koʻzdan kechirgan edi. 300 gektarli hududda 65 ming aholiga moʻljallangan 365 ta koʻp qavatli uy bosqichma bosqich bunyod etilmoqda. Bu uylar 7, 9, 12, 16 va 25 qavatli boʻlib, bu viloyat shaharsozligida oʻziga xos yangilik sanaladi.
Hozirgi kunda ilk uylar va bogʻlar obod aholi manziliga aylanib ulgurdi. 2 ming 887 xonadonli 75 ta uy foydalanishga topshirildi. Ularning negizida Nurafshon mahallasi tashkil etildi. Uylarga 500 dan ortiq oila koʻchib keldi. Ikkita maktab, uchta bogʻcha va poliklinika ochildi.
Hovlidagi oʻyin maydonchalardagi bolalarning shodon qiyqirigʻi koʻngillarni shod qiladi. Joriy yil yana 25 ta uy bunyod etiladi.
Aholi ancha zich yashaydigan hududlar uchun bunday massivlar muhim ijtimoiy ahamiyatga ega. Uy-joylarning sifat va tannarxi xalqimiz imkoniyatiga mos boʻlishi kerakligiga eʼtibor qaratilmoqda.
Bu yerda zamonaviy taʼlim dargohlari, tibbiyot muassasalari, sport majmuasi, savdo va maishiy xizmat shoxobchalari qad koʻtarmoqda.
Aholini ish bilan taʼminlash uchun massiv hududining 50 gektarida kichik sanoat zonasi tashkil etiladi. Oziq-ovqat, tikuvchilik, toʻqimachilik, charm-poyabzal, farmatsevtika, mebelsozlik va elektrotexnika mahsulotlari ishlab chiqaradigan korxonalar ish boshlaydi. Bugunga qadar 423 milliard soʻmlik 5 ta loyiha joylashtirildi. Ularning natijasida 700 ta yangi ish oʻrni yaratiladi.
Massivni ekoshahar deyish mumkin. Sababi 70 gektar maydonda “Yangi Oʻzbekiston bogʻi”, soʻlim xiyobonlar, sunʼiy koʻl, toʻrt ming oʻrinli amfiteatr barpo qilindi. Bogʻ hududiga buta va manzarali daraxtlar ekilgan. Turli attraksionlar oʻrnatilgan.
Davlatimiz rahbari massiv boʻylab yurib, soʻlim maskanni koʻzdan kechirdi. Bogʻda qurilgan amfiteatrda qisqa konsert dasturi namoyish etildi.
