Toshkent shahar Xalq deputatlari kengashi va Sergeli tumani Xalq deputatlari kengashi deputatlari “Madaniyat”, “Xalqobod”, “Uchuvchilar” va “Oltin vodiy” mahalla fuqarolar yigʻinlari faollari bilan uchrashuvlar oʻtkazdilar.
Uchrashuvda deputatlar tomonidan Oʻzbekiston Respublikasi Prezidenti Sh.Mirziyoyevning joriy yilning 24 yanvar kuni Oliy Majlisga qilgan Murojaatnomasida ijtimoiy sohaga oid belgilangan vazifalarning mazmun-mohiyati xamda 4 fevral kuni Toshkent shahar va Sergeli tumani Xalq deputatlari Kengashlarining navbatdagi sessiyalarida koʻtarilgan masalalar boʻyicha qisqacha maʼlumot berildi.
Mazkur uchrashuvlar davomida “Madaniyat” mahalla fuqarolar yigʻini faollari tomonidan hududda bogʻcha qoʻrish masalasi, “Xalqobod” mahalla fuqarolar yigʻini faollari tomonidan esa notarius xizmatini tashkil etish, “Elga xizmat” shaxobchasini ochish va uning narxlarini nazoratga olish muammolari koʻtarildi.
“Uchuvchilar” mahallasi hududida yechimini kutayotgan muammolar yanada koʻpligi aniqlashtirildi. Jumladan, xududda avvalgi 59- va 169- marshrutlar harakatlarini qayta tiklash, chiqindilar shaxobchalarini qurish, mavjud temir garajlarni tartiblashtirish, mahallaga kirish xududidagi zavodga tegishli yuk mashinalarining joylashuv holatlarini tartibga solish, keksalarga tibbiy koʻrikni tashkil etish, 88 uy orqasidagi magistral yoʻlning ariqlarini taʼmirlash kabi muammolarni hal etish takliflari berildi.
“Oltin vodiy” mahalla fuqarolar yigʻinlari faollari ham jim qarab turishmadi. Hududdagi tegishli koʻchalarning asfaltlashtirish masalasini koʻtarishdi. Shuningdek, Mirza Haydar koʻchasining sovuq suv quvurlarini taʼmirlash va ayrim joylariga kanalizatsiya oʻtkazish, 237 maktabning kapital taʼmirlash ishlari talab darajasida amalga oshirilmayotganligi kabi masalalarga eʼtiborni qaratishdi.
“Yangi Oʻzbekiston-yangi saylovlar” shiori ostida saylangan deputatlarning mazkur uchrashuvlari dastlabkisi boʻlgani uchun oʻzini oʻzi boshqarish organlari vakillari va fuqarolar bilan uchrashuv kunlari ham belgilab olindi.
Faollar bildirgan muammolar deputatlar tomonidan muhokama etilib, ularning yechimi yuzasidan mutasaddi tashkilotlarga murojaat etilishi boʻyicha kelishib olindi.
– Men saylangan hududda muammolar yetarli. Jamiyat bor ekan, taraqqiyot bor ekan, muammolar hamisha boʻladi. Biz tegishli tashkilotlar bilan ushbu kamchiliklarni bartaraf etishga, aholining ogʻirini yengil qilishga harakat qilamiz. Bizdan saylovchilar ham ana shu daxldorlikni kutishyapti. – deydi Xalq deputatlari Toshkent shahar kengashi deputati H. Qoʻchkarova.
– Xalq ishonchiga sazovor boʻlgan biz deputatlarga besh yillik faoliyatimiz jarayonlarida katta masʼuliyat yuklatildi. Ishonchni oqlashga harakat qilamiz. Elning ezgu niyatlari ezgu amallarga aylanishida ularning ishonchlariga sadoqatimiz va gʻayrat-shijoatimizni safarbar etish bilan javob beramiz. – deydi Sergeli tumani Xalq deputatlari kengashi deputati A.Mirhidoyatov
Shuningdek, deputatlar uchrashuvdan soʻng “Madaniyat” mahalla fuqarolar yigʻini binosida aholiga xizmat koʻrsatayotgan tikuv atelyesi faoliyati bilan xam yaqindan tanishdilar, Sergeli tuman deputati, tadbirkor S.Neʼmatova tikuvchi qizlarga yaratilgan sharoitlarni koʻrib, tegishli tavsiyalar berdi.
Muammolarni bir-bir sanab oʻtganimiz ham bejiz emas. Besh yillik yakunida ularga yana bir bora qaytamiz, degan umiddamiz. El-yurt xizmatida hormang deputatlar deymiz! El osoyishtaligi, yurt obodligi yoʻlidagi faoliyatingizda ezguliklar tilab qolamiz.
R. Sapoyeva
