AOKA huzuridagi shtabda Sanitariya-epidemiologik osoyishtalik agentligi direktorining birinchi oʻrinbosari Botir Qurbonov ishtirokida oʻtkazilgan brifingda aholi tomonidan yoʻllangan savollarga javob qaytarildi.
SAVOL: Maxsus komissiya qaroriga koʻra koronavirus aniqlangan bemorning davolanish xarajatlarini u kasallik yuqtirgan muassasa yoki tashkilot toʻlar ekan. Agar kasallik qayerdan yuqtirilganligi konkret aniqlanmasa, u holda davolanish xarajatlarini kim toʻlaydi?
Javob: Sanitariya-epidemiologik osoyishtalik agentligining malakali epidemiologlari tomonidan epidemiologik surishtiruv toʻlaqonli olib borilmoqda va har bir aniqlangan kasallik holatining manbasi aniqlanmoqda. Bu jarayonda IIV bilan ham hamkorlik yoʻlga qoʻyilgan.
SAVOL: Agar Oʻzbekiston fuqarosi chet elda boshqa kasallikdan vafot etsa, uning jasadi olib kelingandan soʻng mayit tobut bilan dafn etiladimi yoki islom anʼanalariga muvofiqmi?
Javob: Ushbu holatda xaqiqatda COVID-19 mavjud emasligi toʻgʻrisida maʼlumotnoma taqdim etilsa dafn marosimlari odatdagi tartibda amalga oshirilishi mumkin.
SAVOL: Koronavirus info telegram kanalida Bergamo shahrida koronavirusdan vafot etganlar jasadi kuydirilishi haqida maʼlumot oʻqidim. Oʻzbekistonda ham shunday chora koʻriladimi?
Javob: COVID-19 koronavirus infeksiyasi tasdiqlangan va ushbu kasallikdan vafot etgan bemorlar Sanitariya-epidemiologik osoyishtalik markazlarining mutaxassislari ishtirokida qatʼiy sanitariya-gigiyena talablari asosida hamda zararsizlantirish olib borilib Islom dini urf-odatlari boʻyicha dafn etilmoqda.
SAVOL: Piskent shahri «qizil» hududga kiritilgani sabab, Olmaliq shahriga Piskent orqali oʻtuvchi yoʻl toʻsib qoʻyilgan. Olmaliq «yashil» hudud boʻlsa ham unga oʻtish yoʻllari yopilishi mumkinmi?
Javob: Karantin talablari boʻyicha qizil hudud va yashil hududlar oʻrtasida xarakatlanish toʻxtatladi, yaʼni «qizil» toifadagi hududga kirish va chiqish taqiqlanadi.
