Inson umri gul yangligʻ nozik va u sogʻlom boʻlsa gul yangligʻ goʻzal! Oʻzingizni asrang, yaqinlaringizni eʼzozlang. Hukumatimizning amalga oshirayotgan koʻplab chora-tadbirlariga qaramasdan afsuski, koronavirusga chalingan bemorlar soni ortib bormoqda.
Sogʻliqni saqlash vazirligi Jamoatchilik bilan aloqalar boʻlimining yozishicha, ayni vaqtgacha Oʻzbekistonda koronavirus infeksiyasi aniqlangan shaxslar soni 6 taga oshib, 173 nafarni tashkil etdi.
Biroq, avval xabar berganimizdek xushxabar ham bor. Joriy yil 14 mart kuni London – Toshkent yoʻnalishidagi reys bilan poytaxtimizga kelgan fuqaroda 16 mart kuni koronavirus kasalligi aniqlangan edi. Oʻtgan vaqt davomida u poytaxtdagi Virusologiya ilmiy-tekshirish instituti klinikasida toʻliq davolandi. Ayni paytgacha ushbu kasallikdan sogʻayganlar soni 8 nafarga yetdi.
Bugungi murakkab sharoitda aholini birdamlikka chaqiramiz, vahimaga berilmasdan uyda qolib, vaqtni maroqli oʻtkazishlarida tilakdoshmiz. Olloh nasib qilgan boʻsh vaqtlaringizdan mazmunli va samarali foydalaning!
