Рўзадорлик – фақат сабр, имтиҳони эмас, балки танамизни тозалаш, саломатлигимизни мустаҳкамлаш учун ҳам катта имконият. Лекин, айрим одатлар бу жараёнга путур етказади. Ифторда қуйидаги хатоларни қилманг!
Бирдан кўп овқат еб юбориш. Кун бўйи оч юрган танани бирдан «тўйинтириш» – ҳазм қилиш тизими учун оғир зарба! Натижа: ҳолсизлик, уйқу босиши ва шишиб қолиш. Тўғри йўл: аввал суюқлик ичинг, енгил овқатланиб, тана аста-секин уйғонишига имкон беринг.
Ширин ичимликлар. Шакарли шарбатлар ва газли ичимликлар қондаги қанд миқдорини осмонга чиқариб, кейин эса бирдан тушириб юборади. Натижа: лоҳаслик ва кучсизланиш. Тўғри йўл: оддий сув ёки табиий компот ичиш.
Қовурилган ва ёғли овқатлар. «Оч қоринга яхши кетади» деб ёғли сомса, қовурдоқ, қовурилган картошкага ёпишиб олсангиз, ошқозонга оғирлик туширишингиз аниқ. Натижа: ошқозон оғриғи ва ҳазм қилиш муаммолари. Тўғри йўл: буғда пишган, енгил ва фойдали таомларни танлаш.
Ифтордан кейин ётиб олиш. Кўп овқатдан кейин ётиб олсангиз, ошқозонга юк бўлади, организм овқатни ҳазм қилишга қийналади. Натижа: уйқусизлик ва эрталаб чарчоқ. Тўғри йўл: ҳеч бўлмаса 10-15 дақиқа юринг ва бадан тарбия билан шуғулланинг.
Эсда тутинг! Рўза ғанимат, танани ҳамда руҳиятни поклаш учун имконият. Ўз соғлиғингизга эътиборли бўлинг!
gujum.uz
