АОКА штабида Соғлиқни сақлаш вазирлиги ҳузуридаги Коронавирусга қарши кураш штаби аъзоси Ҳабибулла Оқилов иштирокида бўлиб ўтган брифингда савол ва мурожаатларга жавоб олинди.
САВОЛ: Томоқдан суртма олиб текширилганда, коронавирусни аниқлаш имкони қандай?
ЖАВОБ: Ўзбекистонда COVID-19 вирусини аниқлаш учун ПЦР (Полимепраз занжир реакцияси) ишлатилади. Унинг аниқлаш фоизи жуда юқори —90 фоиздан ошади.
САВОЛ: Нима учун бизнинг мамлакатимизда коронавирусдан ўлим ҳолати жуда паст даражада? Бунга қандай эришилди?
ЖАВОБ: Ўзбекистон карантин ва ўз-ўзини изоляция қилиш тадбирларини ўз вақтида ва қатъий ўрнатгани бунинг энг асосий сабаби. Шунингдек, шифокорларимизнинг фидокорона меҳнати, халқаро тажрибаларни қўллаш ҳам қўл келди. Бошқа яна кўплаб факторлар ҳам бор.
САВОЛ: Йўлларда дезинфекциялаш ишлари тўхтатилдими?
ЖАВОБ: Йўқ. Дезинфекциялаш тадбирлари бекор килингани йўқ.
САВОЛ: Бир танишим коронавирусга тест топширибди. Айтишича, натижа 14 кунлик кузатувдан сўнг аниқ бўлармиш. Шу ростми?
ЖАВОБ: Нотўғри. Полимераз занжир реакцияси биринчи мартадаёқ тўғри жавоб беради. Бемор тузалганлигини аниқлаш учун анализ такрорланади.
САВОЛ: Исроилда коронавирусга анализ оладиган будкалар ташкил қилинибди. Бизда ҳам шундай тест олиш учун жойлар ташкил этилиши мумкинми?
ЖАВОБ: Йўқ. Ўзбекистонда коронавирусни аниқлаш учун анализ оладиган лабораториялар етарли миқдорда. Уларда керакли асбоб ускуналар, реактивлар ва уларда ишлайдиган мутахассислар етарли. Шунинг учун кўчма лаборатория очишга эҳтиёж йўқ.
