Norvegiya inson xavfsizligi sohasida aholining ehtiyojlarini qondirish maqsadida Oʻzbekistonning Orol dengizi hududi uchun 1,1 million dollarni ajratmoqda, deb yoziladi Oʻzbekistondagi BMT vakilligi saytida
1960 yillargacha dunyoning toʻrtinchi yirik yopiq dengizi boʻlmish Orolning qurishi milliy va mintaqaviy chegaralar doirasidan chiquvchi insoniyatning eng katta ekologik falokati hisoblanadi.
2018 yilda BMT shafeligida tashkil etilgan Trast jamgʻarmasi Orol dengizi hududida istiqomat qiluvchi hamjamiyatlarning ekologik va ijtimoiy-iqtisodiy ehtiyojlarini hal qilishda milliy va xalqaro darajada hamkorlikni amalga oshirish va barqaror rivojlanish sohasida global maqsadlarga erishish boʻyicha birgalikdagi saʼy-harakatlarni tezlashtirish uchun yagona maydonni taqdim etadi.
Bugungi kunga kelib Oʻzbekiston Respublikasi Hukumati oʻz boʻyniga Trast jamgʻarmasiga 6,5 million dollar miqdorida ulushini qoʻshish haqida majburiyatni olgan, uning 2,0 million dollari Trast jamgʻarmasining hisobiga oʻtkazib boʻlindi. Norvegiya Jamgʻarmaga mablagʻ kiritgan birinchi tashqi donor boʻldi.
Hozirda Oʻzbekiston Hukumati BMT bilan hamkorlikda Orol dengizi hududida istiqomat qilayotgan jamoalar duch kelayotgan muammolar haqida xabardorlikni oshirish va Trast jamgʻarmasiga qoʻshimcha moliyaviy va texnik resurslarni jalb qilish boʻyicha faol ishlarni olib bormoqda.
«Orol dengizi uchun inson xavfsizligi boʻyicha Koʻp tomonlama sheriklik trast jamgʻarmasi hukumat va rivojlanish sohasidagi hamkorlarga aynan insonlarga yoʻnaltirilgan, jamoalarning ahvoli, talab va ehtiyojlariga asoslangan, harakat surʼatlari va innovatsiyalarga alohida eʼtibor bergan holda yechimlarni ishlab chiqishda birgalikdagi faoliyat olib borish imkonini bermoqda», – dedi Xelena Freyzer xonim, BMTning Oʻzbekistondagi doimiy koordinatori. «Biz Jamgʻarmaning donoriga aylanib, Orol dengizi muammosini hal qilish ishiga tarafdorligini tasdiqlagan Norvegiyaning mazkur qarorini qoʻllab-quvvatlaymiz. Bu qaror Oʻzbekistondagi tezkor barqaror rivojlanishga koʻmak berishda Norvegiyaning qatʼiyatligidan dalolat beradi».
