Rossiya gazini Turkiya va Yevropaga yetkazib beruvchi “Turk oqimi” quvurining ochilish marosimida Turkiya Prezidenti Rejep Tayyip Erdoʻgʻon va uning rossiyalik hamkasbi Vladimir Putin ishtirok etdi, deya xabar beriladi OʻzA saytida.
Maʼlumot oʻrnida, 2017 yilning mayida boshlangan gaz quvurining qurilishi uchun 8 milliard dollar sarflangan.
Uning 930 kilometridan koʻprogʻi Qora dengiz tubidan oʻtadi. Gaz quvuri orqali har yili Rossiyadan Turkiyaga 31,5 milliard kubometr gaz yetkazish koʻzda tutilgan. Gaz hajmining yarmi Bolqon va Markaziy Yevropa, jumladan Bolgariya, Serbiya va Vengriyaga yetkaziladi.
Bolgariyaning “Bulgartransgaz” gaz operatori tomonidan tarqatilgan rasmiy xabarga koʻra, 5 yanvar kuni Rossiya quvur orqali gaz yetkazib berishni boshlagan.
Quvurning ishga tushirish marosimidan avval Putin va Erdoʻgʻon oʻrtasida “yakkama yakka” formatida muzokaralar oʻtkazilgan.
Avvalroq Kreml matbuot xizmati Putin Turkiya prezidenti bilan muzokaralarda Suriya va Liviyadagi vaziyatni muhokama qilishini, shuningdek ikki mamlakat oʻrtasidagi iqtisodiy aloqalar yuzasidan fikr almashishi borasida xabar bergan edi.
7 yanvar kuni Putin Turkiyaga Suriya orqali tashrif buyurdi. Suriyada ayni ziddiyatli mojarolar avj olgan vaqtda Rossiya prezidenti Damashqda prezident Bashar Asad bilan uchrashdi.
