Пойтахтдаги «Диёробод» маҳалласи Учтепа туманидаги энг кенжа  маскан

0
102
марта кўрилган.

Тошкент шаҳар «Соғлом она ва бола» аёллар ва ёшларни қўллаб-қувватлаш марказининг ”Оила маданияти- юрт тинчлиги” мавзуидаги “Салоҳият” кўчма клубининг навбатдаги тадбири ушбу маҳаллада 2018 йил 15 май куни ўтказилди.

Тадбирни «Диёробод» маҳалла фуқаролар йиғини раиси Сайёра  Абдужабборова очиб, 15 май – Халқаро оила куни эканлиги, ушбу сана бутун жаҳонда кенг нишонланиши ҳақида қисқа гапириб, «Соғлом она ва бола»  маркази раҳбари, Республикада хизмат кўрсатган журналист Раъно Зариповага сўз берди.

Маърузачи ўз сўзида оила, оналик ва болаликка оид Ўзбекистон Қонунлари ва қонун ости ҳужжатларини қисқача шарҳлаб, асосан, йиғилиш иштирокчилари билан ушбу мавзуда жонли суҳбат  ўтказди. Ўзбекистон Республикаси Конституцияси, Ўзбекистон Республикасининг Оила кодекси, “Истемолчилар ҳуқуқларини ҳимоя қилиш тўғрисида”ги Қонунидан саволлар бериб, саводли жавоб қайтарганларни китоб ва журналлар билан рағбатлантирди.  Мулоқот орқали  уй бекаларини, бувижонларни ўз устида ишлашга, ўқиш ва фикрлашдан тўхтамасликка чорлади. Тадбирда Муҳаббат Исоқова, Раъно Ёқубова, Наргиза Орозалиева, Покизахон Мирсовурова, Нурхон Турсунбоева каби маҳалла фуқаролари фаол қатнашдилар. Айниқса, Фотимахон Ҳикматова топқирлигини, билимдон бувижон эканлигини намоён қилишди.

Тадбирнинг иккинчи йўналиши анъанага кўра, оилаларнинг мутолаа маданиятини юксалтиришга бағишланди. Тошкент шаҳар «Билим» ахборот кутубхона маркази директори Ҳофизахон Каримова  билим масканидаги мавжуд бўлимлар, китобхонлар учун яратилган шарт-шароитлар, хизмат турлари билан таништириб, китоб ўқишнинг аҳамияти ҳақида алоҳида тўхталиб ўтди. Кутубхона фаолияти акс этган кўргазмали  материалларни йиғилиш қатнашчиларига тарқатди. Шунингдек, “Ёшлар ижоди” туркумида чоп этилган  китобларни маҳалла кутубхонасига совға қилди.

Тадбир якунида Раъно Зарипова ўзининг шахсий кутубхонасидан  китоблар   маҳалла  кутубхонасига совға қилди. Оила даврасида кундалик нашрларни ўқиб боришнинг аҳамияти беқиёс эканлигини гапириб, болаларни     мутола     маданиятига ўргатиш мақсадида  “Соғлом авлод” ва “Тонг юлдузи”  газеталарини йиғилиш қатнашчиларига армуғон қилди.

Учрашув қизғин ва  саволларга бой тарзда ўтди. 

Тадбир   Ўзбекистон Республикаси Олий Мажлиси ҳузуридаги нодавлат нотижорат ташкилотлари ва фуқаролик жамиятининг бошқа институтларини қўллаб-қувватлаш Жамоат фонди  лойиҳаси асосида уюштирилди.

            Жавлон Саъдуллаев                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                          

 

Ёйиш

МУЛОҲАЗА БИЛДИРИШ

Мулоҳаза киритилмади!
Исми шарифингизни киритинг.