«Tadbirkor – elga madadkor», «Tadbirkor – taraqqiyot tayanchi», deymiz. Xoʻsh, tadbirkor boʻlish uchun nima qilish kerak oʻzi?
Zamira Tojiyeva va Ibrohim Jumaniyozovlar oilasi yantoq va doʻrangʻidan boshqa daraxt oʻsmaydigan choʻlu biyobonda yam-yashil archalar va anvoyi gullarni oʻstirib, “Ibrat-Roʻzmat” parrandachilik fermer xoʻjaligini tashkil etishdi. Xorazm viloyatida tuyaqush parvarishini yoʻlga qoʻyishdi.
Xorazm viloyat matbuot va axborot boshqarmasi jamosi “gujum.uz” sayti tahririyati bilan hamkorlikda ushbu choʻlda boʻston yaratayotgan qahramonlar huzurida boʻlib ish tajribasini oʻrgandi.
Yetti xazinaning biri parrandachilik rivojiga munosib hissa qoʻshib kelayotgan oilaning ikki gektarlik xoʻjaligida kezib yurgan tuyaqushlar, bedanalar, turfa tovuq, oʻrdak, tustovuq va gʻozlar hayratingizni oshiradi.
Fermer xoʻjaligidagi Uzun junduk ( Uzuntumshuk) deb nom qoʻyilgan tuyaqush oʻtgan yili 104 ta tuxum tugʻibdi Bu esa jahon boʻyicha deyarli rekord natija ekan. Gennislar kitobiga tuyaqushdan yiliga 106 tuxum olgan fermer kiritilgan ekan. Bu raqamlarni oila boshligʻi Ibrohim Jumaniyozovdan eshitdik.
Turmush oʻrtogʻi Zamira Tojiyeva biologiya oʻqituvchisi boʻlib, parrandachilik xoʻjaligi tuzish gʻoyasini bergan. Ibrohim Jumaniyozov esa turli kitoblarni izlab, oʻqib, internetlarga kirib ushbu gʻoyani rivojlantirishni oʻylagan. Ana shunday qilib mutolaa tufayli tuyaqush yetishtirish yoʻlga qoʻyilgan. Ha, oʻzbek xalqining tashabbuskorligi, izlanuvchanligi tufayli Afrika jonvori Xorazmda ham parvarishlana boshladi. Bu haqida biz hali alohida hikoya qilamiz.
Raʼno Zaripova,
Oʻzbekiston Respublikasida xizmat koʻrsatgan jurnalist
