Oʻzbekiston Yozuvchilar uyushmasi anjumanlar zalida kecha Neʼmat Arslonning “Savti sarvinoz” nomli kitobi taqdimoti boʻlib oʻtdi.
Unda uyushma raisi, Oʻzbekiston Xalq shoiri Sirojiddin Sayyid shunday dedi: Xalqimiz badiiy tafakkurining mahsuli boʻlgan mumtoz va muazzam musiqiy durdona “Shashmaqom”– yaʼni olti maqom xalqaro tashkilot-YUNYeSKO tomonidan jahon madaniy merosi roʻyxatiga kiritilgan. Mamlakatimiz Prezidentining 2018 yil 6 apreldagi “Xalqaro maqom sanʼati anjumanini oʻtkazish toʻgʻrisida”gi qaroriga muvofiq “Maqom musiqa sanʼati va uning jahon sivilizatsiyasida tutgan oʻrni” mavzusida xalqaro ilmiy-amaliy konferensiya oʻtkazildi.
Unda mamlakatimiz Prezidenti maʼruza qilib shunday dedi: “Agar biz asl, haqiqiy sanʼatni bilmoqchi, oʻrganmoqchi boʻlsak, avvalo mumtoz maqom sanʼatini bilishimiz, oʻrganishimiz kerak. Agar biz sanʼatni, madaniyatni koʻtarmoqchi boʻlsak, avvalo mumtoz maqom sanʼatini koʻtarishimiz kerak. Maqom ohanglari, maqom ruhi va falsafasi har bir inson qalbidan, avvalo, unib-oʻsib kelayotgan yosh avlodimizning ongi va yuragidan chuqur joy olishi uchun bor imkoniyatlarimizni safarbar etishimiz zarur”.
Xalqaro maqom sanʼati anjumani Prezident qaroriga muvofiq, bu yil birinchi marta Shahrisabzda boʻlib oʻtdi. Endilikda uni har ikki yilda bir marta oʻtkazilishi belgilangan.
Nemaʼt Arslonning “Savti sarvinoz” kitobi ana shu saʼy-harakatlarga labbay deb javob berdi. Ushbu asarda shahrisabzlik bastakorning ijodiy faoliyati orqali maqom ohanglari, ruhi va falsafasi aks ettirilgan».
Muallif bilan boʻlgan uchrashuvda soʻz olgan ishtirokchilar asarning oʻziga xos xususiyatlari haqida gapirishdi.
Tadbir soʻngida asar muallifi Neʼmat Arslon soʻz olib, oʻn yildan buyon uylab yurgan gʻoyasini tezda kitob holiga keltirishda mamlakat Prezidenti qarori turtki boʻlganini gapirdi. Mamlakat Prezidentiga, uyushmaga Toshkent shahridan ikki xonalik uy ajratgani uchun oʻz minnatdrorchiligini bildirdi.
Uchrashuv soʻngida muallifga Oʻzbekiston Yozuvchilar uyushmasi “Ijod” jamoa fondi tomonidan “Adib va jamiyat” turkumida chop etilgan kitoblar armugʻon qilindi.
R. Safoyeva