Инсоннинг ҳаёти жуда мураккаб,
Қувончлар, ташвишлар юзда мужассам.
Онам чеҳрасига тушган чизиқлар
Бундан дарак берар зимдан қарасам.
Лек ўқий олмасман бу ёзувларни,
Сўзбоши даладир, ё балки пахта.
Эҳтимол, меҳнат деб ёзилганмикан
Юрган йўлларидан қолган харита.
Эҳтимол табиат нисор айлаган
Жаннатий аёлга эҳтиромдир бул.
Чунки шу ёзувга тикилганимда,
Волидамга меҳрим ортади нуқул.
Олимжон ЎСАРОВ
