Xorazm viloyati davlat soliq boshqarmasi boshligʻi Hurmat Abdukarimov Urganch tumani Bekobod qishlogʻi Zargarlar mahallasidagi 20-sonli umumiy oʻrta taʼlim maktab kutubxonasiga “Qadrdon maktabimga kitob sovgʻa qilaman!” shiori ostida kitoblar sovgʻa qildi.
– Kitob insonning eng yaqin doʻsti va maslahatchisi hamda bilim manbaidir. Uni oʻqigan insonning aqli charxlanadi va maʼnaviyati yuksalib boradi. Kitobga boʻlgan muhabbat, uni qadrlash va sevib oʻqish bolalikdan boshlanadi, – deydi Hurmat Abdukarimov.
– Men katta boʻlsam, Hurmat akamdek boʻlaman, –deydi gʻurur bilan 6-sinf oʻquvchisi Jamshidbek Rahimov. – Bugun biz kabi yoshlarga barcha sharoitlar yaratilganligidan foydalanib yanada koʻproq kitob oʻqishga kirishaman va xalqimga nafim tegadigan soliqchi boʻlaman.
-Ayni kunlarda bolalarni kitob mutolaasiga qiziqtirish, ularning qoʻllariga koʻproq kitob berish kabi ibratli va xayrli yumushlar keng koʻlamda amalga oshirilmoqda, — deydi Urganch tumani 20-son maktab kutubxonachisi Qutlibika Qutlimurodova. Bunday xayrli tadbir davomida bolalarda rahbarlarga boʻlgan ishonch, qolaversa kitob oʻqisam, men ham yetuk inson boʻlaman degan fikr uygʻonadi.
Romon ATAJONOV
