Президент Шавкат Мирзиёев 21 ва 22 май кунлари Андижон вилоятида бўлиб, бу ерда амалга оширилаётган ишлар билан танишди, аҳоли билан учрашди. Жумладан, Андижон шаҳридаги 1 минг 200 нафар аёл иш билан таъминлаган “ВБМ Текстиль Груп” масъулияти чекланган жамият фаолияти билан танишди.
Ўн уч йил қаровсиз ётган корхона биноси тадбиркорга «ноль» қийматда берилгач, вазият тамомила ўзгарди. 6,5 миллион доллар маблағ эвазига қурилиш-таъмирлаш ишлари амалга оширилиб, Америка Қўшма Штатлари, Италия, Япониядан тикувчилик ва матога ишлов бериш дастгоҳлари келтириб ўрнатилди.
Замонавий қиёфа касб этган корхона ўн кун аввал фаолият бошлади. Бу ерда йилига ўртача 11 миллион дона тайёр трикотаж маҳсулотлари ишлаб чиқарилади.
МДҲ мамлакатлари билан шартномалар имзоланган бўлиб, йилига 27 миллион долларлик маҳсулот экспорт қилиш мўлжалланган. Бу географияни кенгайтириш мақсадида Европа Иттифоқи давлатлари билан музокаралар олиб борилмоқда.
Корхонада 1 минг 200 нафар аёл иш билан таъминланди. Давлатимиз раҳбари улар билан суҳбатлашди.
– Авваламбор, сизларни яқинлашиб келаётган улуғ айём билан табриклайман. Бу фабрика андижонликларга ўзига хос туҳфа бўлибди. Биз учун ҳар бир иш ўрни муҳим. Бу ерда шунча хотин-қиз ишли бўлганидан жуда хурсандман. Тадбиркорларимиз жаҳон бозорларига чиқмоқда. Бу – дунёқараш ўзгариши, имкониятлар натижаси, – деди Президент.
Мутасаддиларга пахта толасини қайта ишлашни чуқурлаштириб, қўшилган қиймат яратиш, корхоналарга қўшимча инвестициялар йўналтириб, ишлаб чиқаришнинг тўлиқ циклини ўзлаштиришга кўмаклашиш бўйича топшириқлар берилди.
Илгари вилоятда етиштирилган пахта фақат хомашё сифатида сотиларди. Бундан даромад 100 миллион долларга ҳам етмасди. Эндиликда қайта ишлаш ривожланаётгани натижасида жорий йилда қарийб 440 миллион долларлик маҳсулот экспорт қилинади. 2021 йилда бу кўрсаткични 527 миллион долларга етказиш режалаштирилган.
“ВБМ Текстиль Груп” томонидан Андижонда тикувчилик ва жинси ишлаб чиқариш, мато тўқиш ва бўяш корхоналари ташкил этилиши кўзда тутилган.
Шу ерда 2020-2021 йиллар мобайнида вилоятда амалга ошириладиган инвестиция лойиҳалари ҳақида маълумот берилди.
Шунингдек, Президент Андижон вилоятига сафари чоғида «Замонавий қишлоқ» лойиҳаси тақдимоти билан танишди. «Замонавий қишлоқ»даги уйларни бошқа турар жойларга нисбатан арзон қилиш бўйича кўрсатмалар берди.
Давлатимиз раҳбари жорий йил 1 майдан ишга тушган Марҳамат туманидаги “Водий ҳамкор агрофирмаси” томонидан ташкил этилган қуёнчилик кластери билан ҳам танишди. Гўшт нархини арзонлаштириш бўйича тавсиялар берди.
Президент яқиндагина 5,6 гектар майдонда қуриб битказилган Андижон шаҳрида Digital City номли технопарк билан ҳам танишди. Ушбу мажмуа ахборот технологиялари ва инновацион лойиҳаларни қўллаб-қувватлаш, дастурий маҳсулотлар экспортини йўлга қўйишга қаратилган бўлиб, ҳозирда бу ерга туманлардан 328 ёш мутахассис жалб этилган.
