“INFOLIB O’ZBEKISTON-2021” X Milliy axborot-kutubxona haftaligining 2-kuni “Kasbiy mahorat kuni” deb nomlanib, unda Yosh kutubxonachilar forumi ishtirokchilari — yosh mutaxassislar oʻrtasida “Axborot-kutubxona markazining eng yaxshi mutaxassisi” koʻrik-tanlovining Respublika bosqichi boʻlib oʻtdi.
Koʻrik-tanlovda Qoraqalpogʻiston Respublikasi, viloyatlar, Toshkent shahar, tuman (shahar) axborot-kutubxona markazlari mutaxassislari oʻrtasida boʻlib oʻtgan hududiy bosqichlar gʻoliblari ishtirok etishdi.
Bellashuv uyushtirishdan maqsad — axborot-kutubxona mutaxassislarining kasbiy malakasini yuksaltirish, ularning innovatsion faoliyati va ijodiy tashabbuskorligini ragʻbatlantirish, qoʻllab-quvvatlash, ilgʻor tajribalarni ommalashtirish, shuningdek, kutubxonachi kasbining ijobiy imidjini shakllantirish, axborot-kutubxona markazlari oʻrtasida ijtimoiy hamkorlik va sogʻlom raqobatni rivojlantirishdan iborat.
Koʻrik-tanlov uchta yoʻnalish – “Kutubxonachining tashrif qogʻozi”, “Startap loyixalar kelajak kutubxonalari uchun” va “Bilimdon kutubxonachi” shartlari asosida kuch sinashdilar.
Ijodiy bahslar natijalariga koʻra koʻrik-tanlovining 1-oʻrin gʻolibligi – Toshkent shahar «Bilim» axborot-kutubxona markazi mutaxassisi Azimova Dilnozaga nasib qildi. 2-oʻringa Jizzax viloyati Doʻstlik tuman axborot-kutubxona markazi mutaxassisi Raximova Munira va 3-oʻringa Buxoro viloyati Romitan tuman axborot-kutubxona markazi mutaxassisi Boʻronova Marhabo munosib deb topildi. Birinchi oʻrin sohibiga televizor, ikkinchi oʻrinni egallagan mutaxassisga noutbuk, uchinchi oʻrin gʻolibiga planshet berildi.
Shuningdek, ishtirokchilar nominatsiyalar boʻyicha ham taqdirlandilar. Unga koʻra, Nodirabegim nomidagi Namangan viloyati axborot-kutubxona markazi mutaxassisi Adiba Mamatova “Yil yangiligi”, Surxondaryo viloyati Termiz shahar axborot-kutubxona markazi mutaxassisi Dilrabo Temirova “Tomoshabinlar eʼtirofi”, Qaroqalpogʻiston Respublikasi Taxiatosh tuman axborot-kutubxona markazi mutaxassisi Xalbayeva Dilfuza esa «Kasbiga sadoqati uchun» yoʻnalishlarida peshqadamlik qilishdi.
Koʻrik tanlov nominatsiyasi gʻoliblari ham Oʻzbekiston Milliy kutubxonasi tomonidan qimmatbaho sovgʻalar bilan taqdirlandilar.
Hofiza Karimova, Toshkent shahar «Bilim» axborot-kutubxona markazi direktori
