Oʻzbekiston va Amerika Qoʻshma Shtatlari oʻrtasida barcha sohalar kabi kutubxonachilik sohasida ham hamkorlik ishlari yoʻlga qoʻyilmoqda. Shu munosabat bilan, 2017 yil 18 dekabr kuni Toshkent shahar «Bilim» axborot-kutubxona markaziga Oʻzbekiston Respublikasi Tashqi ishlar vazirligining 2017 yil 29 noyabrdagi 20/4807-sonli xatiga asosan Amerika Qoʻshma Shtatlari elchixonasi tomonidan begʻaraz 12 ta kompyuter taqdim etildi.
“Kompyuter va axborot texnologiyalari zamon talabi” deb nomlangan taqdimotda Amerika Qoʻshma Shtatlari Oʻzbekistondagi elchixonasining axborot masalalari boʻyicha maslahatchisi Stiven Anderson, Respublika axborot-kutubxona markazi direktori A.Otaqoʻziyev, Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi Toshkent shahri hududiy boshqarmasi bosh mutaxassisi N.Tursunovlar ishtirok etdilar.
Mehmonlarni xushnud qilish va minnatdorchilik yuzasidan «Bilim» axborot-kutubxona markazi kitobxonlaridan 182-maktab oʻquvchilari, Respublika ixtisoslashtirilgan musiqa va sanʼat litseyi oʻquvchilari tomonidan ingliz tilida musiqiy chiqishlar, ashula va raqslar, sheʼr va monologlar, jajji bolajonlar tomonidan teatrlashtirilgan ertaklar sahnalari taqdim etildi.
Shuningdek, taqdimotni milliy va ingliz tilidagi shoʻx taronalari bilan Uchtepa tumani 9-sonli madaniyat va aholi dam olish markazi ishtirokchilarining chiqishlari yanada ishtirokchilarda katta taassurot qoldirdi.
Elchixona vakili Stiven Anderson kitobxon bolalarning ingliz tilida ravon va sof soʻzlashishidan juda xursand boʻldi. Anderson: “Menga tayyorlangan taqdimot dasturi judayam yoqdi, ayniqsa ingliz tilida shunday ravon soʻzlashadigan, bilimli va aqlli kitobxonlaringiz borligidan, juda ham xursand boʻldim. Bunday aqlli yoshlari bor yurtning albatta, kelajagi buyuk boʻladi”, deb taʼkidladi. Tadbir juda ham koʻtarinki va bayramona ruhda oʻtdi.
Tadbir soʻngida faol ishtirok etgan, oʻzlarining ingliz tilidagi sheʼrlari, qoʻshiqlari va sahna koʻrinishlari bilan xammani koʻnglini zavqqa toʻldirgan oʻquvchilar tadbir tashkilotchilari tomonidan tayyorlangan eng buyuk sovgʻa yaʼni yosh ijodkorlarning sheʼriy kitoblari bilan taqdirlandilar hamda axborot-kutubxona xodimlari, keng kitobxonlar ommasining mehmonlar bilan birga suratga tushish marosimi boʻlib oʻtdi.
