Бугун, 4 декабрь куни Тошкент шаҳридаги «Бунёдкор» стадионида «Бунёдкор» ва «Локомотив» ўртасида Ўзбекистон Кубоги учун финал беллашуви ўтказилди, дея хабар берилади kun.uz сайтида.
Унда аввалроқ мавсум чемпионлигини қўлга киритиб бўлган «темирйўлчилар» кубок финалида ҳам ғалаба қозонди. Ўйин тақдирини Марат Бикмаев 7-дақиқада урган гол ҳал қилди.
Бу натижа, Тошкентнинг учинчи жамоаси «Пахтакор»га қўл келди.
«Локомотив» бунга қадар Ўзбекистон чемпионатининг 2017 йилги мавсуми чемпиони сифатида Осиё Чемпионлар Лигаси гуруҳ босқичи учун берилган 1 дона квотани ютиб олганди. Қаршининг «Насаф» клуби эса 2-ўрин эгаси сифатида ОЧЛ саралашида ўйнайди. Учинчи йўлланмани Кубок соҳиби қўлга киритиши керак эди. Агар финалда зафар қучганида учинчи йўлланма «Бунёдкор»ники бўларди. Аммо «Локомотив» ғалаба қозонгани учун энди бу квота чемпионатда учинчи ўринни қўлга киритган «Пахтакор» жамоасига насиб этадиган бўлди.
